പാരീസ്: പാരീസ് ഒളിമ്പിക്സ് ഗുസ്തിയില്‍ അയോഗ്യയാക്കപ്പെട്ട ഇന്ത്യന്‍ താരം വിനേഷ് ഫോഗട്ടിനെ ആശുപത്രിയില്‍ പ്രവേശിപ്പിച്ചു. നിര്‍ജലീകരണംമൂലം ബോധരഹിതയായതിനെ തുടര്‍ന്നാണ് ആശുപത്രിയില്‍ പ്രവേശിപ്പിച്ചതെന്നാണ് റിപ്പോര്‍ട്ട്. 

ഭാരം ക്രമീകരിക്കാനായി കഴിഞ്ഞ രാത്രിയില്‍ വിശ്രവും വെള്ളവുമില്ലാതെ താരം വ്യായാത്തിലായിരുന്നുവെന്നാണ് റിപ്പോര്‍ട്ട്. അധികമായിരുന്ന 2 കിലോ ഭാരം കുറയ്ക്കാനായി ഭക്ഷണവും വെള്ളവും ഉപേക്ഷിച്ചു. ഉറക്കമില്ലാതെ വ്യായാമം ചെയ്തു. ഇതോടെയാണ് കടുത്ത നിര്‍ജലീകരണം അനുഭവപ്പെട്ടത്. നിലവില്‍ ഒളിംപിക് വില്ലേജിലെ പോളിക്ലിനിക്കിലാണ് വിനേഷ്. 

ബുധനാഴ്ച്ച രാവിലെ നടന്ന ഭാരപരിശോധനയില്‍ അനുവദനീയമായതിനേക്കാള്‍ 100 ഗ്രാം അധികമാണെന്ന് കണ്ടെത്തിയതോടെയാണ് വിനേഷിനെ അയോഗ്യയാക്കിയത്. ഒളിംപിക്‌സ് ഗുസ്തി ഫൈനലില്‍ കടക്കുന്ന ആദ്യ ഇന്ത്യന്‍ വനിതയെന്ന ചരിത്ര നേട്ടത്തില്‍ നില്‍ക്കെയാണ് ഫോഗട്ടിന് അയോഗ്യത നേരിടേണ്ടിവന്നത്. 

വനിതകളുടെ 50 കിലോ ഫ്രീസ്റ്റൈല്‍ ഗുസ്തിയില്‍ സെമിയില്‍ ക്യൂബയുടെ യുസ്നെലിസ് ഗുസ്മാനെ പരാജയപ്പെടുത്തിയാണ് വിനേഷ് ഫൈനലില്‍ എത്തിയത്. മൂന്നാം ഒളിംപിക്സില്‍ പങ്കെടുക്കുന്ന വിനേഷ് ഫോഗട്ട് , ബുധനാഴ്ച രാത്രി പതിനൊന്നരയ്ക്ക് നടക്കുന്ന ഫൈനലില്‍ അമേരിക്കയുടെ സാറാ ഹില്‍ഡ്ബ്രാണ്ടുമായിട്ടാണ് ഏറ്റുമുട്ടേണ്ടിയിരുന്നത്.

Indian wrestler Vinesh Phogat was hospitalized due to dehydration after being disqualified from the Olympics for weight issues.