ന്യൂഡൽഹി: ഹിൻഡൻബർഗ് വിഷയത്തിൽ കോൺഗ്രസ് രാജ്യവ്യാപക പ്രക്ഷോഭം സംഘടിപ്പിക്കുമെന്ന് ദേശീയ ജനറൽ സെക്രട്ടറി കെ.സി വേണുഗോപാൽ എം.പി. വിവാദം ജോയിൻറ് പാർലമെൻററി കമ്മിറ്റി അന്വേഷിക്കണമെന്നും കെ.സി വേണുഗോപാൽ ആവശ്യപ്പെട്ടു. സെബി ചെയർപേഴ്സണ് എതിരെ ആരോപണം ഉയർന്നിട്ടും അവർ എങ്ങനെ കസേരയിൽ തുടരുന്നുവെന്നും അദ്ദേഹം ചോദിച്ചു. 

രാജ്യം കണ്ട ഏറ്റവും വലിയ ഓഹരി കുംഭകോണങ്ങളിൽ ഒന്നായി ഹിൻഡൻബർഗ് റിസർച്ച് പുറത്തുവിട്ട റിപ്പോർട്ട് മാറുകയാണ്. സെബി സുപ്രിം കോടതിയിൽ പോലും കാര്യങ്ങൾ മറച്ചുവച്ചു. വിഷയത്തിൽ നടപടിയെടുക്കേണ്ടത് സുപ്രിം കോടതിയാണ്. വിഷയത്തിൽ പ്രധാനമന്ത്രി നരേന്ദ്ര മോദി ഒരക്ഷരം മിണ്ടുന്നില്ലെന്നും അദ്ദേഹം ആരോപിച്ചു. 

അതേസമയം, രാഹുൽ ഗാന്ധിക്കെതിരെ ഇ.ഡി അന്വേഷണം പ്രഖ്യാപിച്ച് വിഷയം തിരിച്ചുവിടാൻ ആണ് സർക്കാരിന്റെ നീക്കമെന്നും കെ.സി വേണുഗോപാൽ പറഞ്ഞു. രാഹുൽ ഗാന്ധിക്ക് നോട്ടിസ് അയച്ച് ഭീഷണിപ്പെടുത്താമെന്ന് കരുതേണ്ടെന്നും അദ്ദേഹം പറഞ്ഞു. 

ഇതിനിടെ, സെബി ചെയർപേഴ്സൺ മാധബി ബുച്ചിനെതിരെ ഹിൻഡൻ ബർഗ്  വീണ്ടും രംഗത്ത് വന്നിരുന്നു. ഏത് അന്വേഷണത്തെയും നേരിടാൻ മാധബി തയ്യാറാകുമോയെന്നും സിംഗപൂർ കമ്പനി ഇടപാട് നടത്തിയവരുടെ വിവരങ്ങൾ പുറത്ത് വിടുമോയെന്നുമാണ് ഹിൻഡൻബർഗിന്റെ ചോദ്യം. റിപ്പോർട്ടിൽ ഉന്നയിച്ച വാദങ്ങളെ സാധൂകരിക്കുന്നതാണ് മാധബിയുടെ വിശദീകരണം എന്നും ഹിൻഡൻബർഗ് ചൂണ്ടിക്കാട്ടുന്നു.

ഇന്ത്യൻ ഓഹരി വിപണിയെ നിയന്ത്രിക്കുന്ന സ്വയംഭരണ സ്ഥാപനമായ സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യയുടെ (സെബി) ചെയർപേഴ്സൻ മാധബി പുരി ബുച്ചിനും ഭർത്താവിനും അദാനി ഗ്രൂപ്പിൻറെ വിദേശ രഹസ്യ കമ്പനികളിൽ നിക്ഷേപമുണ്ടെന്ന ഞെട്ടിക്കുന്ന വെളിപ്പെടുത്തലാണ് അമേരിക്കൻ നിക്ഷേപ ഗവേഷണ സ്ഥാപനമായ ഹിൻഡെൻബെർഗ് റിസർച്ച് കഴിഞ്ഞ ദിവസം നടത്തിയത്. അദാനി ഗ്രൂപ്പ് സ്ഥാപനങ്ങളിലെ ക്രമക്കേടുകളെ കുറിച്ച് സെബി മേധാവി മാധബി പുരി ബുച്ച് ശരിയായ അന്വേഷണം നടത്തിയില്ലെന്നും ആരോപണത്തിൽ പറയുന്നുണ്ട്.