ദില്ലി: ജമ്മുകാശ്മീരിൽ ഭീകരർക്കെതിരെയുള്ള  സൈനിക നീക്കത്തിനിടെ വെടിയേറ്റ് ജീവന്‍ നഷ്ടമായ കരസേനയുടെ ഡോഗ് സ്‌ക്വാഡിലെ നായ കെന്‍റിന്‌ രാഷ്ട്രപതിയുടെ ധീരതാ പുരസ്കാരം. ഗോള്‍ഡന്‍ ലാ​​ബ്രഡോർ ഇനത്തിൽപ്പെട്ട കെന്റിന് മരണാനന്തര ബഹുമതിയായാണ് ഗാലൻട്രി അവാർഡ്  പുരസ്കാരം നൽക്കുന്നത്. കഴിഞ്ഞ വർഷം സെപ്റ്റംബറിൽ ജമ്മുവിൽ സൈനികര്‍ക്കൊപ്പമുള്ള ഓപ്പറേഷനിടെയാണ് ആറ് വയസുകാരിയായ കെന്‍റ്  ഭീകരരുടെ വെടിയേറ്റ് വീരമൃത്യു വരിച്ചത്.

രജൗരിയിൽ ഭീകരർ തമ്പടിച്ചിട്ടുണ്ടെന്ന രഹസ്യ വിവരത്തെ തുടർന്നാണ് സൈന്യം എത്തിയത്. ഭീകരരുടെ  താവളത്തിലേക്ക് സൈന്യത്തിന് വഴികാട്ടിയായിരുന്നത് കെന്റാണ്. സൈന്യമെത്തിയതോടെ ഭീകരർ വെടിയുതിർത്ത് തുടങ്ങി. ഭീകരർ ശക്തമായ വെടിവെപ്പ് തുടർന്നുവെങ്കിലും കെന്‍റ് പിന്മാറാതെ മുന്നേറി കൊണ്ടിരുന്നു. ഭീകരുടെ താവളത്തിലേക്ക് നീങ്ങിയ കെന്‍റിന്  തന്റെ ഹാൻഡ്ലറായ സൈനികനെ ഭീകരരുടെ ആക്രമണത്തിൽനിന്ന് രക്ഷപ്പെടുത്താൻ ശ്രമിക്കുന്നത്തിനിടെയാണ് വെടിയേറ്റത്. സംഭവ സ്ഥലത്തുവെച്ച് തന്നെ കെന്‍റ്  വീര മൃത്യു വരിച്ചു.

8B8 ആർമി നമ്പറിലുള്ള പ്രത്യേക ട്രാക്കർ നായ ആയിരുന്നു കെന്റ്.  ഭീകരരെ ചെറുത്ത് തോൽപ്പിച്ച സൈന്യം പോരാട്ടഭൂമിയിൽ വീരമൃത്യുവരിച്ച കെന്‍റിനെ ത്രിവർണ പതാക പുതപ്പിച്ച് പുഷ്പചക്രം സമർപ്പിച്ചാണ് യാത്രാമൊഴി നൽകിയത്. ഓപ്പറേഷനിൽ രണ്ട് ഭീകരരും ഒരു സൈനികനും കൊല്ലപ്പെട്ടിരുന്നു. മൂന്ന് സുരക്ഷാ ഉദ്യോ​ഗസ്ഥർക്കും രണ്ട് സൈനികർക്കും ഒരു പൊലിസുകാരനും ഏറ്റുമുട്ടലിൽ പരിക്കേറ്റിരുന്നു.