വണ്ടൂര്‍: മലിനജലം പാതയോരത്തെ ഓടയിലേക്കൊഴുക്കിയ രണ്ടു കെട്ടിടങ്ങള്‍ ആരോഗ്യ വകുപ്പധികൃതര്‍ പൂട്ടിച്ചു. വണ്ടൂര്‍ കരുണാലയപ്പടിയില്‍ ഇതര സംസ്ഥാന തൊഴിലാളികളെ താമസിപ്പിച്ചിരുന്ന കെട്ടിടങ്ങളാണു നാട്ടുകാരുടെ പാരാതിയെത്തുടര്‍ന്നു പൂട്ടിച്ചത്. മതിയായ മാലിന്യ സുരക്ഷാ സംവിധാനങ്ങളില്ലാതെ കെട്ടിടം പ്രവര്‍ത്തിപ്പിച്ചതിനാല്‍ പരിസരവാസികളുള്‍പ്പെടെയുള്ളവര്‍ ഏറെ ദുരിതത്തിലായിരുന്നു.
പരാതിയെത്തുടര്‍ന്ന് ആരോഗ്യവകുപ്പധികൃതര്‍ മുന്നറിയിപ്പു നല്‍കിയിരുന്നെങ്കിലും സമയപരിധിക്കുള്ളില്‍ മാലിന്യ പ്രശ്‌നത്തിനു പരിഹാരം കാണാന്‍ കെട്ടിട ഉടമകള്‍ക്കു സാധിച്ചില്ല. ഹെല്‍ത്ത് സൂപ്പര്‍വൈസര്‍ എ.ജെ ജോസ്, ഹെല്‍ത്ത് ഇന്‍സ്‌പെക്ടര്‍ എം.വിജയന്‍ എന്നിവരുടെ നേതൃത്വത്തിലാണു പരിശോധന നടത്തി നടപടിയെടുത്തത്. മേഖലയില്‍ അടിസ്ഥാന സൗകര്യങ്ങളൊന്നുമില്ലാത്ത കെട്ടിടങ്ങളില്‍ ഇതര സംസ്ഥാനക്കാരെ തിങ്ങിപാര്‍പ്പിച്ചിരിക്കുന്നതു വ്യാപകമാണ്. ഇവരെ ഇവിടെയെത്തിച്ച ഇടനിലക്കാരാണു കടുത്ത മനുഷ്യാവകാശ ലംഘനങ്ങള്‍ നടത്തുന്നത്. വൃത്തിഹീനമായ പരിസരങ്ങളില്‍ താമസിപ്പിക്കുന്ന കെട്ടിട ഉടമകള്‍ക്കെതിരെയുള്ള നടപടികള്‍ വരും നാളുകളില്‍ കൂടുതല്‍ ശക്തമാക്കുമെന്ന് ആരോഗ്യവകുപ്പധികൃതര്‍ പറഞ്ഞു.