യുഎഇ വിസ പൊതുമാപ്പ് പ്രയോജനപ്പെടുത്തി രാജ്യം വിടാൻ തീരുമാനിക്കുന്ന അനധികൃത താമസക്കാർക്ക് ഫ്ലൈറ്റ് ടിക്കറ്റുകളിൽ കിഴിവ് നൽക്കുമെന്ന് വാഗ്ദാനം ചെയ്യുമെന്ന് ഫെഡറൽ അതോറിറ്റി ഫോർ ഐഡൻ്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ഐസിപി) അറിയിച്ചു.

എമിറേറ്റ്സ്, ഇത്തിഹാദ്, എയർ അറേബ്യ എന്നിവയുൾപ്പെടെയുള്ള യുഎഇ എയർലൈനുകളുമായി ആശയവിനിമയം നടത്തിയതായി ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (ജിഡിആർഎഫ്എ) ദുബായ് ഡെപ്യൂട്ടി ഡയറക്ടർ ജനറൽ മേജർ ജനറൽ ഉബൈദ് മുഹൈർ ബിൻ സുറൂർ പറഞ്ഞു. രാജ്യം വിടാൻ ആഗ്രഹിക്കുന്നവരും എന്നാൽ സാമ്പത്തിക ഞെരുക്കം നേരിടുന്നവരുമായവർക്ക് വിമാന ടിക്കറ്റ് നിരക്കിൽ ഇളവ് ലഭിക്കും.2024 സെപ്തംബർ 1 മുതൽ  ഒക്ടോബർ 30 വരെ രണ്ട് മാസത്തേക്ക് പൊതുമാപ്പിലൂടെ ഈ ഇളവ് നേടാൻ സാധിക്കും.

ടൂറിസ്റ്റ് വിസകളും കാലഹരണപ്പെട്ട റെസിഡൻസി വിസകളും ഉൾപ്പെടെ എല്ലാത്തരം വിസകളും പൊതുമാപ്പ് പദ്ധതിയിൽ ഉൾപ്പെടുന്നു. യാതൊരു രേഖകളുമില്ലാതെ ജനിച്ചവർക്കും പൊതുമാപ്പ് പ്രയോജനപ്പെടുത്താനും അവരുടെ പദവി ശരിയാക്കാനും കഴിയും. സ്‌പോൺസർമാരിൽ നിന്ന് ഒളിച്ചോടിയവർക്കും അപേക്ഷിക്കാം. എന്നിരുന്നാലും, അനധികൃതമായി രാജ്യത്ത് പ്രവേശിച്ചവർക്ക് പൊതുമാപ്പിന് അപേക്ഷിക്കാൻ അർഹതയില്ല.

അധിക സ്‌റ്റേ പിഴയോ എക്‌സിറ്റ് ഫീയോ ഈടാക്കില്ലെന്ന് ഐസിപി ഉറപ്പുനൽകി. രാജ്യം വിടാൻ ആഗ്രഹിക്കുന്നവർക്ക് പ്രവേശന വിലക്ക് ലഭിക്കില്ല, അവർക്ക് ഉചിതമായ വിസയുമായി എപ്പോൾ വേണമെങ്കിലും യുഎഇയിലേക്ക് വരാം.

ടിക്കറ്റ് നിരക്ക് കുറയ്ക്കുന്നതിനുള്ള സാധ്യതയെക്കുറിച്ച് ചർച്ച ചെയ്യാൻ എയർലൈൻ പ്രതിനിധികളുമായി നിരവധി ഏകോപന യോഗങ്ങൾ നടത്തിയതായും, പൊതുമാപ്പ് പ്രയോജനപ്പെടുത്തി യുഎഇ വിടുന്നവർക്ക് നിരക്കിളവ് നൽകാമെന്ന് സമ്മതിച്ചുകൊണ്ട്, “വിമാനക്കമ്പനികൾ നിർദ്ദേശത്തോട് അനുകൂലമായി പ്രതികരിച്ചു”വെന്നും ഐസിപി പറഞ്ഞു.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക