തൊടുപുഴ: സ്വന്തം മകളെ അഞ്ചു വയസ്സു മുതൽ എട്ടു വയസ്സുവരെ നിരന്തരം ലൈംഗിക പീഡനത്തിനിരയാക്കിയ കേസിൽ പിതാവിന് മൂന്ന് ജീവപര്യന്തം തടവും മൂന്ന് ലക്ഷം രൂപ പിഴയും വിധിച്ച് ഇടുക്കി പൈനാവ് അതിവേഗ കോടതി. പ്രതി മരണം വരെ ജയിലിൽ കഴിയണമെന്ന് ജഡ്ജ് വി. മഞ്ജുവിന്റെ ഉത്തരവിൽ വ്യക്തമാക്കി.

2020-ലാണ് ഈ ക്രൂരമായ പീഡനം പുറത്തുവന്നത്. ഒന്നാം ക്ലാസിൽ പഠിക്കുന്ന കാലം മുതൽ പിതാവ് വീട്ടിൽവെച്ച് കുട്ടിയെ ലൈംഗികമായി ഉപദ്രവിച്ചതായി മൊഴിയിൽ പറയുന്നു. സ്ഥിരമായ വയറുവേദനയെ തുടർന്ന് കുട്ടി അമ്മയോടൊപ്പം ആശുപത്രിയിൽ ചികിത്സ തേടിയിരുന്നു. 2020-ൽ ഒരു ദിവസം ബസ് കാത്തുനിൽക്കവെ, പിതാവ് ഇങ്ങനെ ചെയ്യുന്നത് കൊണ്ടാണോ വയറുവേദന മാറാത്തതെന്ന് കുട്ടി അമ്മയോട് സംശയമായി ചോദിച്ചു. തുടർന്ന് അമ്മ വിശദമായി ചോദിച്ചറിഞ്ഞതോടെയാണ് പീഡനവിവരം പുറത്തുവന്നത്.

കരിമണ്ണൂർ  പൊലീസ് കേസെടുത്ത് അന്വേഷണം നടത്തി പ്രതിക്കെതിരെ അന്തിമ റിപ്പോർട്ട് സമർപ്പിച്ചു. കുടുംബം വാടകയ്ക്ക് താമസിച്ചിരുന്ന രണ്ട് വീടുകളിൽ വെച്ചാണ് പീഡനം നടന്നതെന്ന് കുട്ടി മൊഴി നൽകി. കോടതിയിൽ മൊഴി നൽകാൻ എത്തിയ ദിവസം കുട്ടിയുടെ അമ്മ ബോധരഹിതയായി വീണ സംഭവവും ഉണ്ടായി.

പ്രോസിക്യൂഷന്റെ വാദപ്രകാരം, സ്വന്തം പിതാവിൽനിന്ന് കുട്ടി അനുഭവിച്ച ക്രൂരമായ ലൈംഗിക അതിക്രമത്തിന് പരമാവധി ശിക്ഷ വിധിക്കണമെന്ന് കോടതി അംഗീകരിച്ചു. പിഴ അടച്ചാൽ അത് കുട്ടിക്ക് നൽകണമെന്നും, അല്ലാത്തപക്ഷം ആറ് വർഷം അധിക തടവ് അനുഭവിക്കണമെന്നും കോടതി വിധിച്ചു. കുട്ടിക്ക് മതിയായ നഷ്ടപരിഹാരം നൽകാൻ ജില്ലാ ലീഗൽ സർവീസ് അതോറിറ്റിയോടും കോടതി ശുപാർശ ചെയ്തു.

സമീപകാലത്ത് ഇതേ കോടതി സമാനമായ കേസുകളിൽ രണ്ട് പേർക്ക് ഇരട്ട ജീവപര്യന്തവും മറ്റൊരാൾക്ക് മൂന്ന് ജീവപര്യന്തവും വിധിച്ചിരുന്നു. 2020-ൽ കരിമണ്ണൂർ പൊലീസ് ഇൻസ്പെക്ടർ ബിജോയ് പി.ടി. അന്വേഷണം നടത്തിയ ഈ കേസിൽ സീനിയർ സിവിൽ പൊലീസ് ഓഫീസർ ആശ പി.കെ. പ്രോസിക്യൂഷനെ സഹായിച്ചു. സ്പെഷ്യൽ പബ്ലിക് പ്രോസിക്യൂട്ടർ ഷിജോമോൻ ജോസഫ് കണ്ടത്തിങ്കര പ്രോസിക്യൂഷനുവേണ്ടി കോടതിയിൽ ഹാജരായി.

A father was sentenced to three life terms and fined Rs. 3 lakh by the Idukki Painavu Fast Track Court for sexually abusing his daughter from age 5 to 8. The abuse, starting when she was in first grade, was revealed in 2020 when the child, suffering persistent stomach pain, confided in her mother. The Karimannoor police investigated, and the court ordered lifelong imprisonment, directing the fine to the victim or an additional six-year term if unpaid. The court also recommended compensation via the District Legal Service Authority.