അബുദബി: അനധികൃതമായി സ്വന്തം നിലയ്ക്ക് ഫത്വകൾ അഥവാ മതവിധികൾ നൽകുന്ന വ്യക്തികൾക്കും സ്ഥാപനങ്ങൾക്കുമെതിരേ മുന്നറിയിപ്പുമായി യുഎഇ ഫത്വ അതോറിറ്റി. യുഎഇയിൽ ഔദ്യോഗികമായി മതവിധികൾ നൽകാനുള്ള ചുമതല സർക്കാർ ഏൽപ്പിച്ചിരിക്കുന്നത് യുഎഇ കൗൺസിൽ ഫോർ ഫത്വയ്ക്കാണ്. ഈ കൗൺസിലിന് മാത്രമേ മതവിധികൾ പുറപ്പെടുവിക്കാൻ അനുവാദമുള്ളൂ എന്നും അല്ലാത്തവർ സ്വന്തം നിലയ്ക്ക് ഫത്വ നൽകിയാൽ അവർക്കെതിരേ ശക്തമായ നിയമ നടപടികൾ കൈക്കൊള്ളുമെന്നും ഫത്വ അതോറിറ്റി വ്യക്തമാക്കി. 10,000 ദിർഹം മുതൽ രണ്ട് ലക്ഷം ദിർഹം വരെയാണ് ഇത്തരം വ്യക്തികൾക്കും സ്ഥാപനങ്ങൾക്കും പിഴ ചുമത്തുകയെന്നും വ്യക്തമാക്കി.

രാജ്യത്തെ 2024 ലെ ഫെഡറൽ ലോ നമ്പർ (3) അനുസരിച്ച്, യുഎഇയിൽ പൊതു ഫത്വകൾ പുറപ്പെടുവിക്കാൻ അനുമതിയുള്ള ഏക അധികാര സ്ഥാപനം യുഎഇ കൗൺസിൽ ഫോർ ഫത്വയാണ്. നിയമലംഘനം നടത്തി മതവിധി പുറപ്പെടുവിക്കുന്ന സ്ഥാപനം സാഹചര്യത്തിനനുസരിച്ച് അടച്ചുപൂട്ടാനുള്ള സാധ്യതയും ശിക്ഷാ നടപടിയിൽ ഉൾപ്പെടുന്നുണ്ട്. നിയമലംഘനം ആവർത്തിച്ചാൽ പിഴ ഇരട്ടിയാക്കുമെന്നും അതോറിറ്റി കൂട്ടിച്ചേർത്തു. പല വിവാദ വിഷയങ്ങളിലും സാമൂഹ്യ മാധ്യമങ്ങൾ വഴിയും അല്ലാതെയും ചില വ്യക്തികളും സ്ഥാപനങ്ങളും മതവിധികൾ നൽകുന്നതുമായി ബന്ധപ്പെട്ട റിപ്പോർട്ടുകളുടെ അടിസ്ഥാനത്തിലാണ് ഈ മുന്നറിയിപ്പ്.

യുഎഇയിൽ ഫത്വ പുറപ്പെടുവിക്കുന്നതിനുള്ള ഔദ്യോഗിക അതോറിറ്റിയായി യുഎഇ കൗൺസിൽ ഫോർ ഫത്വ പ്രവർത്തിക്കുന്നു. യുഎഇയിലെ ഫത്വകളുമായി ബന്ധപ്പെട്ട സമീപനങ്ങളും നയങ്ങളും നിയമനിർമ്മാണങ്ങളും വികസിപ്പിക്കുന്നതിനുള്ള ശ്രമങ്ങളും ദർശനങ്ങളും ലക്ഷ്യങ്ങളും ഏകീകരിക്കാൻ നേതൃത്വം നൽകലും കൗൺസിലിന്റെ ചുമതലയാണെന്നും അധികൃതർ വ്യക്തമാക്കി.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക