ന്യൂയോര്‍ക്ക്: അടുത്ത വര്‍ഷത്തോടെ റോബോ ടാക്‌സികള്‍ നിരത്തിലിറക്കുമെന്ന് പ്രമുഖ ഇലക്ട്രിക് വാഹന നിര്‍മാതാക്കളായ ടെസ് ല സി.ഇ.ഒ ഇലോണ്‍ മസ്‌ക്. തുടക്കത്തില്‍ ഈ ഡ്രൈവറില്ലാ ടാക്‌സികള്‍ കാലിഫോര്‍ണിയയിലും ടെക്‌സസിലുമാണ് ഓടുകയെന്നും അദ്ദേഹം അറിയിച്ചു. പണമൊടുക്കി ആളുകള്‍ക്ക് സ്വയം യാത്രചെയ്യാവുന്ന തരത്തിലായിരിക്കും ടാക്‌സികള്‍.

അതേസമയം അപകട സാധ്യതയുള്ളതിനാല്‍ ഡ്രൈവറില്ലാ വാഹനങ്ങള്‍ക്ക് അനുമതി ലഭിക്കുക എളുപ്പമല്ലെന്നാണ് വിദഗ്ധര്‍ പറയുന്നത്. 2019ല്‍ ടെസ് ല സ്വയം സഞ്ചരിക്കുന്ന വാഹനങ്ങളുടെ പെര്‍മിറ്റിന് അപേക്ഷിച്ചതായും എന്നാല്‍ ഒരു ഡ്രൈവറുണ്ടെങ്കിലേ അനുമതി നല്‍കാനാകൂവെന്നും കാലിഫോര്‍ണിയ മോട്ടോര്‍ വാഹന വകുപ്പ് പറയുന്നു.

ഈ മാസം 10ന് റോബോ ടാക്‌സി പരിചയപ്പെടുത്തുന്ന ചടങ്ങില്‍ മസ്‌ക് രണ്ട് സീറ്റും രണ്ട് വാതിലുമുള്ള സൈബര്‍ കാബ് അവതരിപ്പിച്ചിരുന്നു. കാമറകളുടെയും നിര്‍മിത ബുദ്ധിയുടെയും സഹായത്തോടെയാണിത് റോഡിലൂടെ സഞ്ചരിക്കുക. ഒരുവര്‍ഷം 20 ലക്ഷം സൈബര്‍ കാബുകള്‍ നിര്‍മിക്കാനാണ് ലക്ഷ്യമിടുന്നത്. ഇതിന് ഒന്നിലേറെ ഫാക്ടറികള്‍ വേണ്ടിവരുമെന്നും ചിലപ്പോള്‍ പ്രതിവര്‍ഷം 40 ലക്ഷം കാറുകള്‍ നിര്‍മിക്കുമെന്നും മസ്‌ക് പറയുന്നു.