കൊച്ചി: ഹൈദരാബാദില്‍ നടന്ന ഇന്ത്യന്‍ കാര്‍ഷിക ഗവേഷണ കൗസില്‍ (ഐ.സി.എ.ആര്‍) ദക്ഷിണ മേഖല സ്‌പോര്‍ട്‌സ് മീറ്റില്‍ കൊച്ചി ആസ്ഥാനമായ കേന്ദ്ര സമുദ്രമത്സ്യ ഗവേഷണ സ്ഥാപനം (സി.എം.എഫ്.ആര്‍.ഐ) ഓവറോള്‍ ചാംപ്യന്‍മാരായി. ഹൈദരാബാദ് ആസ്ഥാനമായ നാഷണല്‍ അക്കാദമി ഓഫ് അഗ്രികള്‍ച്ചറകല്‍ റിസര്‍ച്ച് മാനേജ്‌മെന്റ് സംഘടിപ്പിച്ച മീറ്റില്‍ ഐ സി എ ആറിന് കീഴിലുള്ള 25 ഗവേഷണ സ്ഥാപനങ്ങളില്‍ നിന്നായി 685 പേരാണ് പങ്കെടുത്തത്.
കേരളം, തമിഴ്‌നാട്, കര്‍ണാടക, ആന്ധ്രപ്രദേശ്, തെലുങ്കാന എന്നീ സംസ്ഥാനങ്ങളിലെ സ്ഥാപനങ്ങളാണ് ഇവ.38 മത്സരയിനങ്ങളില്‍ നിന്ന് 77 പോയിന്റ് നേടിയ ാണ് ദക്ഷിണ മേഖല സ്‌പോര്‍ട്‌സ് മീറ്റില്‍ തുടര്‍ച്ചയായ രണ്ടാം തവണയും സി.എം.എഫ്.ആര്‍.ഐ ചാംപ്യന്‍മാരായത്. 72 പോയിന്റ് കരസ്ഥമാക്കിയ ബംഗളൂരുവിലെ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ഹോര്‍ട്ടികള്‍ച്ചര്‍ റിസര്‍ച്ചിന് (ഐ ഐ എച്ച് ആര്‍) ആണ് രണ്ടാം സ്ഥാനം. സി.എം.എഫ്.ആര്‍.ഐക്ക് വേണ്ടി വിവിധ സെന്ററുകളില്‍ നിന്നായി 51 പേര്‍ സ്‌പോര്‍ട്‌സ് മീറ്റില്‍ പങ്കെടുത്തു. ഫുട്‌ബോള്‍, വോളിബോള്‍, ബാഡ്മിന്റ സിംഗിള്‍സ്, ബാഡ്മിന്റ ഡബിള്‍സ്, എന്നീ മത്സരയിനങ്ങളില്‍ സി.എം.എഫ്.ആര്‍ ഐ ഒന്നാം സ്ഥാനം നേടി.