കാക്കനാട്: സിവില്‍ സ്റ്റേഷന്‍ ബസ് സ്റ്റോപ്പില്‍ ബസ് ഇറങ്ങണമെങ്കില്‍ മൂക്കുപൊത്തണം. ഇല്ലെങ്കില്‍ അസഹ്യമായ തലവേദനയോ ശാരീരിക അസ്വസ്ഥതയോ അനുഭവപ്പെടാം. ബസ് സ്റ്റാന്റിനു സമീപത്തുള്ള ചായക്കടയുടെ പരിസരത്തും ഓട്ടോ സ്റ്റാന്റിനു സമീപവും മൂത്രം ഒഴിക്കുന്നതാണ് യാത്രക്കാരെ വലയ്ക്കുന്നത്. ദുര്‍ഗന്ധം രൂക്ഷമായതോടെ പലരു പരാതിപ്പെട്ടിട്ടും ഇതിനെതിരേ നടപടി എടുക്കാന്‍ അധികൃതര്‍ക്ക് കഴിഞ്ഞിട്ടില്ല.
സിവില്‍ സ്റ്റേഷനിലും നഗരസഭയിലും ജില്ലാ പഞ്ചായത്തിലും മറ്റു ഇതര സര്‍ക്കാര്‍ സ്ഥാപനങ്ങളിലും വ്യവസായഐ.ടി സ്ഥാപനങ്ങളിലും പല ആവശ്യങ്ങളുമായി ബന്ധപ്പെട്ട് ദിനവും ആയിരക്കണക്കിനു ആളുകളാണ് ജില്ലയുടെ ഹൃദയ ഭാഗമായ കാക്കനാട് എത്തിചേരുന്നത്. എന്നാല്‍ പ്രാഥമിക ആവശ്യങ്ങള്‍ നിര്‍വഹിക്കാന്‍ ആകെയുള്ളത് ഒരു കംഫര്‍ട്ട് സ്റ്റേഷന്‍ മാത്രമാണ്.
നഗരസഭ ബസ് സ്റ്റാന്റിലെ കംഫര്‍ട്ട് സ്റ്റേഷന്‍ ഇപ്പോള്‍ സ്വകാര്യ ബസിലും ഇതര വാഹനങ്ങളിലും ഉപയോഗിക്കുന്ന ഗ്രീസും മറ്റു സാമഗ്രികളുംസൂക്ഷിക്കുന്ന സ്ഥലമായും ഉപയോഗിക്കുന്നത്. കൂടാതെ ബസ് സ്റ്റാന്റ് ആണങ്കില്‍ സ്വകാര്യ വര്‍ക്ക്‌ഷോപ്പുകാരന്റെ മെക്കാനിക്കല്‍ സ്ഥലമായും ഉപയോഗിക്കുന്നു. ഇതിനെതിരേയും നഗരസഭ ഒരു നടപടിയും സ്വീകരിക്കുന്നുമില്ല.
സ്ത്രീകളും കുട്ടികളും അടങ്ങുന്ന യാത്രക്കാരുടെയും പൊതു ജനങ്ങളുടെയും പെതു ആവശ്യമായ വൃത്തിയുള്ള ടോയ്‌ലറ്റ് എന്ന കാര്യത്തില്‍ നഗരസഭാ അധികൃതര്‍ താല്‍പര്യം കാട്ടുന്നില്ല എന്നതാണ് സത്യം.
പ്രാഥമിക ആവശ്യങ്ങള്‍ ഉന്നയിക്കുമ്പോള്‍ പോലും ഫണ്ടില്ലെന്ന് പറയുന്ന അധികൃതര്‍ ഇത്തവണ ഓണാഘോഷ പരിപാടിയ്ക്കായി ചിലവഴിക്കുന്നത് പതിനെട്ട് ലക്ഷമാണ്.