ദുബൈ: ഡെലിവറി മേഖലയിൽ പരിശോധന ശക്തമാക്കി ദുബൈ റോഡ് ട്രാൻസ്പോർട്ട് അതോറിറ്റി. നിയമം ലംഘിച്ച 77 ബൈക്കുകൾ അധികൃതർ പിടിച്ചെടുക്കുകയും 1200 പേർക്ക് പിഴ ചുമത്തുകയും ചെയ്തു. ഡെലിവറി ബൈക്കുകൾ കൂടുതൽ സജീവമായ ദുബൈ നഗരത്തിലെ ഹെസ്സ സ്ട്രീറ്റ്, സബീൽ സ്ട്രീറ്റ്, ജുമൈറ, ഡൗൺടൗൺ, മിർദിഫ്, മോട്ടോർ സിറ്റി എന്നിവിടങ്ങളിലാണ് ആർ.ടി.എ പരിശോധന ഊർജിതമാക്കിയത്. രജിസ്ട്രേഷനില്ലാത്തതും, ഇൻഷൂറൻസില്ലാത്തതും, റോഡിലിറക്കാൻ യോഗ്യതയില്ലാത്തതുമായ 44 ബൈക്കുകൾ പരിശോധനയിൽ ആർ.ടി.എ പിടിച്ചെടുത്തു. പെർമിറ്റില്ലാത്തതും, റോഡിലിറക്കാൻ പാടില്ലാത്തതുമായ 33 ഇലക്ട്രിക്ക് ബൈക്കുകൾ ഡൈലിവറി ജീവനക്കാരിൽ നിന്ന് പിടിച്ചെടുത്തിട്ടുണ്ട്.

 

ഡെലിവറിമേഖലയിൽ പാലിക്കേണ്ട സുരക്ഷാ ചട്ടങ്ങളിൽ വീഴ്‌ചവരുത്തിയതിന് 1200 പേർക്കാണ് ആർ.ടി.എ പിഴ ചുമത്തിയത്. കൂടാതെ ഹെൽമെറ്റ്, കൈയുറ, നീഗാർഡ്, എൽബോ ഗാർഡ് എന്നിവ ധരിക്കാത്തവർക്കെല്ലാം പിഴ ലഭിച്ചിട്ടുണ്ട്. പിഴ ലഭിച്ചവരിൽ പ്രൊഫഷണൽ ട്രെയിനിങ് സർട്ടിഫിക്കറ്റില്ലാതെ ഡെലവറി നടത്തിയവരും, അപകടകരമായി ബൈക്കോടിച്ചവരും ഉൾപ്പെടുന്നു. 11,000 ലേറെ പരിശോധനകളാണ് ആർ.ടി.എ നടത്തിയത്. 3,600 ലേറെ ഡെലിവറി ഡ്രൈവർമാരെ ലക്ഷ്യമിട്ട് സുരക്ഷാ ബോധവൽകരണ കാമ്പയിനും ആർ.ടിഎ. ആരംഭിക്കും. ഡെലിവറി ഡ്രൈവർമാർ അധികൃതർ നടത്തുന്ന പരിശോധനയുമായി സഹകരിക്കണമെന്ന് ആർ.ടി.എ അറിയിച്ചു.