ലക്നൗ: ക്രൂരമായ ശാരീരിക പീഡനത്തിലും അധിക്ഷേപത്തിലും മനംനൊന്ത് ഉത്തർപ്രദേശിൽ ദളിത് യുവാവ്(17) ആത്മഹത്യ ചെയ്‌തു. ഉത്തർപ്രദേശിലെ ബസ്തിയിലാണ് രാജ്യത്തെ നടക്കുന്ന സംഭവം നടന്നത്. നാട്ടിൽ ഒരു ജന്മദിനാഘോഷത്തിൽ പങ്കെടുക്കുന്നതിനിടെയാണ് യുവാവിനെ നാലുപേർ ചേർന്ന് നഗ്നനാക്കുകയും ക്രൂരമായി മർദിക്കുകയും ദേഹത്ത് മൂത്രമൊഴിക്കുകയും ചെയ്‌തത്‌. ഇതിൻ്റെ വീഡിയോ ദൃശ്യങ്ങൾ അവർ പകർത്തുകയും ചെയ്തു.

ഡിസംബർ 20- ന് നടന്ന ജന്മദിന പരിപാടിയിലേക്ക് ക്ഷണം ലഭിച്ചതിനെ തുടർന്നാണ് മകൻ പോയതെന്ന് കുടുംബം പറയുന്നു. ഉപദ്രവമേൽപ്പിക്കുന്നതിന്റെ ദൃശ്യങ്ങൾ പുറത്തുവിടുമെന്ന് ഭീഷണിപ്പെടുത്തുകയും അധിക്ഷേപിക്കുകയും ചെയ്ത ആക്രമകാരികൾ കുട്ടിയേക്കൊണ്ട് നിർബന്ധിച്ച് തുപ്പൽ നക്കിയെടുപ്പിക്കുകയും ചെയ്തുവെന്നും കുടുംബം പറഞ്ഞു.

മാനസികമായി ആകെ തകർന്ന യുവാവ് വീട്ടിൽ തിരിച്ചെത്തുകയും മാതാപിതാക്കളോട് സംഭവം പറയുകയും ചെയ്‌തു. ഇതിന് ശേഷമാണ് ആത്മഹത്യ ചെയ്തത്. പിന്നാലെ മൃതദേഹവുമായി പോലീസ് സ്‌റ്റേഷനിലെത്തിയ കുടുംബം സംഭവത്തിൽ അടിയന്തര അന്വേഷണം വേണമെന്ന് ആവശ്യപ്പെടുകയായിരുന്നു. സംഭവത്തിൽ കേസെടുക്കാനും നടപടി സ്വീകരിക്കാനും അധികൃതർ ആദ്യം തയ്യാറായില്ലെന്നും കുടുംബം പറഞ്ഞു. തുടർന്ന് മൃതദേഹവുമായി ബസ്തി പോലീസ് സൂപ്രണ്ടിന്റെ ഓഫീസിലെത്തി പ്രതിഷേധിച്ചു. കുടുംബത്തിന്റെ പരാതിയിൽ കേസ് രജിസ്റ്റർ ചെയ്‌തിട്ടുണ്ടെന്നും മൃതദേഹം പോസ്റ്റ്മോർട്ടത്തിന് അയച്ചുവെന്നും അന്വേഷണം നടക്കുകയാണെന്നും പോലീസ് സൂപ്രണ്ട് പ്രദീപ് കുമാർ ത്രിപാതി പറഞ്ഞു.