തിരുവനന്തപുരം: സീരിയല്‍ നടന്‍ ദിലീപ് ശങ്കറിനെ ഹോട്ടല്‍മുറിയില്‍  മരിച്ച നിലയില്‍ കണ്ടെത്തി. മൃതദേഹത്തിന് മൂന്ന് ദിവസത്തെ പഴക്കമുണ്ട്. എറണാകുളം സ്വദേശിയാണ് ദിലീപ് ശങ്കര്‍. 

നാല് ദിവസം മുമ്പാണ് ദിലീപ് ശങ്കര്‍ ഹോട്ടലില്‍ മുറിയെടുത്തത്. സീരിയല്‍ അഭിനയത്തിനായാണ് ഇദ്ദേഹം ഹോട്ടലില്‍ മുറിയെടുത്തത് എന്നാണ് വിവരം. മരണകാരണം വ്യക്തമായിട്ടില്ല.

ദീര്‍ഘകാലമായി മലയാള സീരിയല്‍ രംഗത്ത് സജീവമാണ് ദിലീപ് ശങ്കര്‍.  27ന് ഷൂട്ട് കഴിഞ്ഞ ശേഷം അണിയറപ്രവര്‍ത്തകര്‍ തന്നെയാണ് അദ്ദേഹത്തെ ഹോട്ടലില്‍ എത്തിച്ചത്.  രണ്ട് ദിവസമായി അദ്ദേഹം മുറി വിട്ട് പുറത്തേക്കൊന്നും പോയിരുന്നില്ലെന്നാണ് വിവരം. ദിലീപിനെ ഫോണില്‍ ലഭിച്ചിരുന്നില്ല. അടുത്ത ദിവസത്തെ ഷൂട്ടിനായി കൂട്ടിക്കൊണ്ടുപോവാന്‍ പ്രൊഡക്ഷന്‍ കണ്‍ട്രോളര്‍ എത്തിയപ്പോഴാണ് ദിലീപ് ശങ്കറിനെ റൂമില്‍ മരിച്ചനിലയില്‍ കണ്ടെത്തിയത്. മുറിയില്‍ നിന്ന് ദുര്‍ഗന്ധം വമിച്ചിരുന്നു. 

ദിലീപ് ശങ്കറിന് കരള്‍ രോഗമുണ്ടായിരുന്നു എന്നാണ് സഹപ്രവര്‍ത്തകര്‍ പറയുന്നത്. മരണത്തില്‍ അസ്വാഭാവികതയില്ലെന്നാണ് പൊലിസിന്റെ പ്രാഥമിക വിലയിരുത്തല്‍. എന്താണ് മരണ കാരണമെന്നത് പോസ്റ്റ്മോര്‍ട്ടം പരിശോധനയിലേ വ്യക്തമാകൂ.