തിരുവനന്തപുരം: സ്കൂൾ കലോത്സവത്തിൽ ഇത്തവണ അപ്പീലുകളിലൂടെ എത്തുന്ന മത്സരാർഥികളുടെ എണ്ണം കുറയും. ഈ മാസം നാലിനു ആരംഭിക്കുന്ന സ്കൂൾ കലോത്സവത്തിൽ 249 ഇനങ്ങളിൽ പ്രതിഭകൾ മാറ്റുരയ്ക്കുമ്പോൾ അപ്പീലുമായി എത്തുന്നവരുടെ എണ്ണം 249 ആണ്. കോട്ടയം, വയനാട് ജില്ലകളിൽ നിന്നാണ് കുറവ് അപ്പീലുകൾ. ഏഴ് എണ്ണം വീതം. ജില്ലാ കലോത്സവങ്ങളിൽ തെരഞ്ഞെടുക്കപ്പെടാതെ പോയവർ വിധിയിൽ അപാകതക്കെതിരേ നൽകിയ അപ്പീലിലും വ്യാപകമായി വെട്ടിനിരത്തലുകൾ നടന്നുവെന്നാണ് ആരോപണം. 

ജില്ലയിൽ ഗ്രേഡ് നേടിയവരുടെ അപ്പീലുകൾ തള്ളിയപ്പോൾ ഒരു ഗ്രേഡും നേടാത്തവർ അപ്പീൽ വഴി മത്സരിക്കാൻ എത്തുന്നുണ്ട്. തലസ്ഥാന ജില്ലയിലടക്കം ചില ഡാൻസ് ഇനങ്ങളിൽ മാത്രമാണ് അപ്പീലുകൾ കൂടുതലായി അനുവദിച്ചിട്ടുള്ളത്.
നേരത്തെ ജില്ലാതലങ്ങളിൽ അപ്പീല്‍തുക 1000 ആയിരുന്നു. ഇത്തവണ 5000 ആയി വര്‍ധിപ്പിച്ചിരുന്നു. 1566 അപ്പീലുകളാണ് ലഭിച്ചത്. 

ഇതുവഴി മാത്രം 78,30,000 രൂപയാണ് ലഭിച്ചത്. ഇതിൽ 249  അപ്പീലുകള്‍ മാത്രമാണ് അനുവദിച്ചത്. അപ്പീലുകൾ വ്യാപകമായി തള്ളിയതോടെ മത്സരാർഥികൾ നിരാശയിലാണ്. പലരും കോടതിയെ സമീപിച്ചിട്ടുമുണ്ട്. പലരും സ്വാധീനമുപയോഗിച്ച് അപ്പീലുകളിൽ ഇടം നേടിയതായും ആക്ഷേപം ഉയർന്നിട്ടുണ്ട്.

ജില്ല തിരിച്ചുള്ള കണക്ക് 
(അപ്പീലുകളുടെ എണ്ണം, അനുവദിച്ചത്, എന്ന ക്രമത്തിൽ) 

1.തിരുവനന്തപുരം     213   -     33

2.കൊല്ലം      129 -   13

3.പത്തനംതിട്ട         68  -  8

4.ആലപ്പുഴ       76   -   12

5.കോട്ടയം      63   -   7

6.ഇടുക്കി     38    -  9

7.എറണാകുളം       77  -   9

8.തൃശൂർ     138 -    27

9.പാലക്കാട്      139  -  19

10.മലപ്പുറം      140  -    25

11.കോഴിക്കോട്     243   - 44

12.വയനാട്      42  -   7

13 കണ്ണൂർ       43  -   21

14.കാസർകോട്     76   -  15