തിരുവനന്തപുരം: കലോത്സവ വേദിയിൽ ഡ്രോൺ പറത്തുന്നതിന് നിയന്ത്രണം. ജഡ്‌ജസിന്റെ തലക്ക് മുകളിലൂടെ ഡ്രോൺ പറത്തുന്നത് ശ്രദ്ധയിൽപ്പെട്ടെന്നും, അത്തരം നടപടികൾ ഒഴിവാക്കണമെന്നും, ഇത് സംബന്ധിച്ച് പൊലിസിന് നിർദേശം നൽകിയിട്ടുണ്ടെന്നും മന്ത്രി വി.ശിവൻകുട്ടി പറഞ്ഞു. 

മേളയുടെ എല്ലായിടത്തും മികച്ച പങ്കാളിത്തമാണ് കാണുന്നത്. ഉദ്ഘാടനത്തിൽ 15000ൽ കൂടുതൽ ആളുകൾ പങ്കെടുത്തു. കൃത്യസമയത്ത് തന്നെ മത്സരങ്ങൾ പൂർത്തിയാക്കാനുള്ള നടപടികൾ സ്വീകരിച്ചിട്ടുണ്ട്. കലാപരമായി ഉയർന്ന നിലവാരം പുലർത്തുന്ന കുട്ടികൾ സാമ്പത്തികമായി പിന്നാക്കം ആയതിനാൽ ഒരുതരത്തിലും വിവേചനം അനുഭവിക്കാൻ പാടില്ലെന്ന് മന്ത്രി പറഞ്ഞു. ഇത്തരം വിവേചനങ്ങൾ ഒഴിവാക്കാൻ അധ്യാപകർ മുൻകയ്യെടുക്കണം. വിധികർത്താക്കളെ സൂക്ഷ്‌മമായാണ് തിരഞ്ഞെടുത്തിരിക്കുന്നത്.

പാർക്കിങ് സംബന്ധിച്ച ആശങ്കകൾ ഉണ്ടായിരുന്നെങ്കിലും, അവയെല്ലാം പരിഹരിച്ച് മുന്നോട്ടു പോകാനായി. ഗതാഗതം സുഗമമാക്കുന്നതിനായി കെഎസ്‌ആർടിസിയും സർവിസ് നടത്തുന്നുണ്ട്. ഇതിനോടകം 80 മത്സരങ്ങൾ പൂർത്തിയായി. ഇതുവരെ 47000ത്തിലധികം ആളുകൾ ഭക്ഷണശാലയിൽ നിന്ന് ഭക്ഷണം കഴിച്ചു. ഭക്ഷണശാല ഇന്നലെ രാത്രി ഒരുമണി വരെ തുറന്നുപ്രവർത്തിച്ചെന്നും മന്ത്രി പറഞ്ഞു.

Minister V Sivankutty emphasized that economically backward children should not face discrimination, highlighting the importance of inclusivity.