പത്തനംതിട്ട: ശബരിമല സ്വർണക്കൊള്ള കേസിൽ പ്രതിയായ മുൻ തിരുവിതാംകൂർ ദേവസ്വം പ്രസിഡന്റ് എ. പത്മകുമാറിന് സിപിഎമ്മിന്റെ നോട്ടീസ്. തപാൽ വഴിയാണ് പത്തനംതിട്ട ജില്ല നേതൃത്വം നോട്ടീസ് നൽകിയത്. സിപിഎം സംസ്ഥാന നേതൃത്വത്തിന്റെ അറിവോടെയാണ് പത്തനംതിട്ട ജില്ല നേതൃത്വം നോട്ടീസ് നൽകിയതെന്നാണ് വിവരം. 

പാർട്ടിക്ക് അവമതിപ്പുണ്ടാക്കിയതിൽ വിശദീകരണം നൽകണമെന്നാണ് നോട്ടീസിൽ പറയുന്നത്. വിശദീകരണം തേടിയ ശേഷം പാർട്ടി എ. പത്മകുമാറിനെതിരെ നടപടി സ്വീകരിക്കുമെന്നാണ് വിവരം. പത്മകുമാറിനെ പത്തനംതിട്ട ജില്ല കമ്മിറ്റിയുടെ വാട്സാപ്പ് ഗ്രൂപ്പിൽ നിന്നും കഴിഞ്ഞ ദിവസം പുറത്താക്കിയിരുന്നു. 

ശബരിമല സ്വർണക്കൊള്ള കേസിൽ മൂന്നര മാസത്തോളം ജയിലിൽ കിടന്ന പത്മകുമാർ അടുത്തിടെയാണ് ജാമ്യത്തിൽ പുറത്തിറങ്ങിയത്. ജയിലിൽ ആയിട്ടും പാർട്ടി നടപടികളൊന്നും സ്വീകരിച്ചിരുന്നില്ല.