വയനാട്: വി ഡി സതീശൻ നാളെ ആത്മഹത്യ ചെയ്ത ഡിസിസി ട്രഷറർ എൻ എം വിജയന്റെ വീട് സന്ദർശിക്കും. ആദ്യമായാണ് വി ഡി സതീശൻ എൻ എം വിജയന്റെ വീട്ടിലെത്തുന്നത്. വിജയൻ എഴുതിയ കത്ത് കുടുംബം വായിച്ചു കേൾപ്പിച്ചപ്പോൾ കത്തിൽ വ്യക്തതയില്ലെന്ന് വി ഡി സതീശൻ പറഞ്ഞത് വിവാദമായിരുന്നു. സിപിഎം സംസ്ഥാന സെക്രട്ടറി എം വി ഗോവിന്ദനും നാളെ കുടുംബാംഗങ്ങളെ സന്ദർശിക്കും.

അതേസമയം പൊലിസ് കേസില്‍ കൂടുതല്‍ തെളിവുകള്‍ ശേഖരിച്ചുവരികയാണ്. ആത്മഹത്യ കുറിപ്പിലും ഒപ്പം പുറത്ത് വന്ന കത്തിലും പ്രതികളെ കുറിച്ചുള്ള പരാമർശം സാമ്പത്തിക ഇടപാടുകള്‍ക്ക് തെളിവാണെന്നാണ് പൊലിസ് നിഗമനം. കേസുമായി ബന്ധപ്പെട്ട് പൊലീസ് ഇത് വരെ 30 പേരുടെ മൊഴി എടുത്തു. കേസുമായി ബന്ധപ്പെട്ട്  വിജിലസ് അന്വേഷണവും നടക്കുന്നുണ്ട്. സംഭവത്തില്‍ ആത്മഹത്യ പ്രേരണകുറ്റം ചുമത്തപ്പെട്ട കോണ്‍ഗ്രസ് നേതാക്കളുടെ അറസ്റ്റ് കോടതി തടഞ്ഞിരുന്നു. കഴിഞ്ഞ ദിവസം മുൻകൂർ ജാമ്യാപേക്ഷ പരിഗണിച്ച കോടതി ഐസി ബാലകൃഷ്ണനെയും എൻ ഡി അപ്പച്ചനെയും പതിനഞ്ച് വരെ അറസ്റ്റ് ചെയ്യരുതെന്ന് വാക്കാല്‍ നിര്‍ദേശം നൽകിയിരുന്നു.

Kerala opposition leader VD Satheesan will visit the family of late DCC treasurer NM Vijayan tomorrow, to pay condolences.