രാജ്കോട്ട്: അയർലാൻഡ് വിമൺസിനെതിരായ രണ്ടാം ഏകദിനത്തിലും ജയം തുടർന്ന് ഇന്ത്യ. രണ്ടാം മത്സരത്തിൽ 116 റൺസിന്റെ കൂറ്റൻ വിജയമാണ് ഇന്ത്യ സ്വന്തമാക്കിയത്. രാജ്‌കോട്ടിലെ സൗരാഷ്ട്ര ക്രിക്കറ്റ് സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ഇന്ത്യ 50 ഓവറിൽ അഞ്ചു വിക്കറ്റ് നഷ്ടത്തിൽ 370 റൺസാണ് നേടിയത്. വിമൺസ് ഏകദിനത്തിൽ ഇന്ത്യ നേടുന്ന ഏറ്റവും ഉയർന്ന ടോട്ടൽ ആണിത്. 

ഇന്ത്യക്കായി ജെമീമ റോഡ്രിഗസ് സെഞ്ച്വറി നേടി മികച്ച പ്രകടനമാണ് നടത്തിയത്. 91 പന്തിൽ 102 റൺസാണ് ജെമീമ അടിച്ചെടുത്തത്. 12 ഫോറുകളാണ് താരത്തിന്റെ ബാറ്റിൽ നിന്നും പിറന്നത്. ഹാർലിൻ ഡിയോൾ, സ്‌മൃതി മന്ദാന, പ്രതീക റാവൽ എന്നിവർ അർദ്ധ സെഞ്ച്വറി നേടി മികച്ച ടോട്ടൽ പടുത്തുയർത്തുന്നതിൽ നിർണായകമായ പങ്കുവഹിച്ചു. 

ഹാർലിൻ ഡിയോൾ 84 പന്തിൽ 89 റൺസാണ് നേടിയത്. 15 ഫോറുകൾ അടങ്ങുന്നതായിരുന്നു താരത്തിന്റെ ഇന്നിംഗ്സ്. സ്‌മൃതി 54 പന്തിൽ 73 റൺസാണ് നേടിയത്. 10 ഫോറുകളും രണ്ട് സിക്സുകളും അടങ്ങുന്നതായിരുന്നു താരത്തിന്റെ ഇന്നിംഗ്സ്. റാവൽ എട്ട് ഫോറുകളും ഒരു സിക്‌സും ഉൾപ്പടെ 61 പന്തിൽ 67 റൺസും നേടി. 

വിജയലക്ഷ്യം പിന്തുടർന്നിറങ്ങിയ അയർലാൻഡ് 50 ഓവറിൽ ഏഴ് വിക്കറ്റ് നഷ്ടത്തിൽ 254 റൺസാണ് നേടിയത്. ഇന്ത്യൻ ബൗളിങ്ങിൽ ദീപ്തി ശർമ്മ മൂന്ന് വിക്കറ്റും പ്രിയ മിശ്ര രണ്ട് വിക്കറ്റും നേടി മികച്ച പ്രകടനമാണ് നടത്തിയത്. ടിറ്റാസ് സാധു, സയാലി സത്ഘരെ എന്നിവർ ഓരോ വിക്കറ്റും വീഴ്ത്തി. അയർലാൻഡിനായി കോൾട്ടർ റെയ്‌ലി 113 പന്തിൽ 80 റൺസ് നേടി മികച്ച പ്രകടനമാണ് നടത്തിയത്. 10 ഫോറുകളാണ് താരം നേടിയത്.