മൊഹാലി: 2025 ഐപിഎല്ലിൽ പഞ്ചാബ് കിങ്സിന്റെ പുതിയ ക്യാപ്റ്റനായി ശ്രേയസ് അയ്യരിനെ നിയമിച്ചിരുന്നു. പഞ്ചാബിന്റെ ക്യാപ്റ്റൻ സ്ഥാനം ഏറ്റെടുത്തതോടെ മറ്റൊരു ഇന്ത്യൻ ക്യാപ്റ്റനും ഇല്ലാത്ത ഒരു അപൂർവനേട്ടമാണ് ശ്രേയസ് സ്വന്തമാക്കിയത്. മൂന്ന് വ്യത്യസ്ത ഐപിഎൽ ടീമുകളുടെ ക്യാപ്റ്റൻ ആവുന്ന ആദ്യ ഇന്ത്യൻ താരമായാണ് അയ്യർ മാറിയത്. ഡൽഹി ക്യാപിറ്റൽസിൻ്റെയും കൊൽക്കത്ത നൈറ്റ് റൈഡേഴ്സിൻ്റെയും ക്യാപ്റ്റൻ ആയാണ് ശ്രേയസ് അയ്യർ പ്രവർത്തിച്ചിട്ടുള്ളത്. 

കുമാർ സംഗക്കാര , മഹേല ജയവർധന , സ്റ്റീവ് സ്മിത്ത് എന്നിവർക്ക് ശേഷം ഐപിഎൽ ചരിത്രത്തിൽ മൂന്ന് ടീമുകളുടെ ക്യാപ്റ്റൻ ആവുന്ന നാലാമത്തെ താരം കൂടിയാണ് ശ്രേയസ്. മെഗാ ലേലത്തിൽ 26.5 കോടിക്കായിരുന്നു ശ്രേയസിനെ പഞ്ചാബ് സ്വന്തമാക്കിയിരുന്നത്. ഐപിഎൽ ചരിത്രത്തിൽ ലേലത്തിൽ ഒരു താരത്തിന് ലഭിക്കുന്ന ഏറ്റവും ഉയർന്ന രണ്ടാമത്തെ തുക കൂടിയാണിത്. 

പഞ്ചാബ് കിങ്സിന്റെ പയതിനെഴാം ക്യാപ്റ്റൻ ആയാണ് ശ്രേയസ് ചുമതലയേറ്റത്. യുവരാജ് സിങ്, കുമാർ സംഗക്കാര, മഹേള ജയവർദ്ധനെ, ആദം ഗിൽക്രിസ്റ്റ്, ഡേവിഡ് ഹസി, ജോർജ് ബെയ്ലി, വീരേന്ദർ സെവാഗ്, ഡേവിഡ് മില്ലർ, മുരളി വിജയ്, ഗ്ലെൻ മാക്സ്വെൽ, ആർ അശ്വിൻ, കെ എൽ രാഹുൽ, മായങ്ക് യാദവ്, ശിഖർ ധവാൻ, സാം കറൻ, ജിതേഷ് ശർമ്മ എന്നിവരായിരുന്നു ഇതിനു മുമ്പ് പഞ്ചാബിനെ നയിച്ചിരുന്ന ക്യാപ്റ്റന്മാർ.