ദുബൈ: ഇന്ത്യയുമായുള്ള യുഎഇയുടെ എണ്ണ ഇതര വ്യാപാരത്തില്‍ വമ്പന്‍കുതിപ്പ്. 2024ലെ ആദ്യ പത്തു മാസത്തില്‍ എണ്ണ ഇതര വ്യാപാരത്തില്‍ 22% വര്‍ധനവാണ് രേഖപ്പെടുത്തിയിരിക്കുന്നത്. നിലവില്‍ അറേബ്യന്‍ കരുത്തരുടെ ഏറ്റവും വലിയ മൂന്നാത്തെ വ്യാപാരപങ്കാളിയാണ് ഇന്ത്യ.

2024 ഒക്ടോബര്‍ അവസാനം വരെ 5,380 കോടി യുഎസ് ഡോളറിന്റെ എണ്ണ ഇതര വ്യാപാരമാണ് ഇന്ത്യയും യുഎഇയും തമ്മില്‍ നടന്നത്. മുന്‍ വര്‍ഷത്തെ അപേക്ഷിച്ച് 22.6 ശതമാനത്തിന്റെ വര്‍ധനയാണ് എണ്ണ ഇതര വ്യാപാര രംഗത്ത് രേഖപ്പെടുത്തിയിരിക്കുന്നതെന്ന് യുഎഇ സാമ്പത്തിക മന്ത്രാലയം അറിയിച്ചു. ഇരുരാഷ്ട്രങ്ങളും തമ്മില്‍ നിലവിലുള്ള സമഗ്രസാമ്പത്തിക പങ്കാളിത്ത കരാറാണ് വ്യാപാരത്തില്‍ വളര്‍ച്ച കൈവരിക്കാന്‍ സഹായിച്ചത്.

വ്യാപാരവും നിക്ഷേപവും ശക്തിപ്പെടുത്തുന്നതിന്റെ ഭാഗമായി 2022 മേയ് മാസത്തിലാണ് ഇന്ത്യയും യുഎഇയും സമഗ്ര സാമ്പത്തിക പങ്കാളിത്ത കരാറില്‍ ഒപ്പുവെച്ചത്. നേരത്തെ ഊര്‍ജ മേഖലയില്‍ മാത്രമുണ്ടായിരുന്ന വ്യാപാര ബന്ധമാണ് സമഗ്ര സാമ്പത്തിക പങ്കാളിത്ത കരാറിലൂടെ മറ്റു മേഖലയിലേക്കും വ്യാപിപ്പിച്ചത്. 2030ഓടെ നൂറ് ബില്യണ്‍ യുഎസ് ഡോളറിന്റെ എണ്ണ ഇതര വ്യാപാരമാണ് കരാറിലൂടെ ഇരു രാജ്യങ്ങളും ലക്ഷ്യമിടുന്നത്.

2022-23 ലെ കണക്കു പ്രകാരം 8,365 കോടി യുഎസ് ഡോളറിന്റെ വ്യപാരമാണ് ഇരുരാഷ്ട്രങ്ങള്‍ക്കുമിടയിലുള്ളത്. 2013-14 കാലയളവില്‍ ഇത് 5950 കോടി യുഎസ് ഡോളറായിരുന്നു. യുഎഇയില്‍ നിന്ന് ഇന്ത്യയിലേക്ക് ഇറക്കുമതി ചെയ്യുന്ന വസ്തുക്കളുടെ മൂന്നിലൊന്നും പെട്രോളിയം ഉത്പന്നങ്ങളാണ്.