കണ്ണൂര്‍: ജില്ലയിലെ രണ്ടു വ്യത്യസ്ത സ്ഥലങ്ങളില്‍ ബോംബ് പൊട്ടിത്തെറിച്ച് പതിനൊന്നുകാരനും യുവാവിനും ഗുരുതരമായി പരുക്കേറ്റു. കളിക്കുന്നതിനിടെ ബോംബ് പൊട്ടിത്തെറിച്ച് പാനൂര്‍ ചെണ്ടയാട് കിഴക്കുവയല്‍ വലിയപറമ്പത്ത് ചന്ദ്രന്റെയും പ്രിയയുടെയും മകന്‍ ദേവനന്ദു (11), കാട് വെട്ടിത്തെളിക്കുന്നതിനിടെ ബോംബ് പൊട്ടി ഇരിട്ടി കാക്കയങ്ങാട് പാലപ്പുഴയിലെ എം.പി ഹൗസില്‍ അബ്ദുല്‍ റസാഖിനുമാണു (35) പരുക്കേറ്റത്.
ഗുരുതരമായി പരുക്കേറ്റ ദേവനന്ദുവിനെ തലശ്ശേരി ഇന്ദിരാഗാന്ധി ആശുപത്രിയില്‍ പ്രഥമശുശ്രൂഷയ്ക്കു ശേഷം കോഴിക്കോട്ടെ സ്വകാര്യ ആശുപത്രിയിലും അബ്ദുല്‍റസാഖിനെ കണ്ണൂര്‍ എ.കെ.ജി ആശുപത്രിയില്‍ പ്രഥമശുശ്രൂഷക്കു ശേഷം മംഗളൂരുവിലെ സ്വകാര്യ ആശുപത്രിയിലും പ്രവേശിപ്പിച്ചു.
ഇന്നലെ വൈകുന്നേരം അഞ്ചോടെയായിരുന്നു ദേവനന്ദുവിന് സ്‌ഫോടനത്തില്‍ പരുക്കേറ്റത്. തൊട്ടടുത്ത വീട്ടിലെ പുകക്കുഴലില്‍ സൂക്ഷിച്ച ബോംബ് വീണ് പൊട്ടിയാണു ചെണ്ടയാട് ഗുരുദേവ സ്മാരകം യു.പി സ്‌കൂള്‍ ആറാംക്ലാസ് വിദ്യാര്‍ഥിയായ ദേവനന്ദുവിനു കാലിനും കണ്ണിനും പരുക്കേറ്റത്. ചന്ദ്രന്റെ ബന്ധുവായ പരേതനായ സി.വി മോഹനന്റെ അടച്ചിട്ട വീടിന്റെ പുകക്കുഴലിലായിരുന്നു ബോംബുകള്‍ സൂക്ഷിച്ചിരുന്നത്. പുകക്കുഴലിന്റെ ഇഷ്ടിക വലിച്ചപ്പോള്‍ ബോംബ് താഴെവീണ് പൊട്ടുകയായിരുന്നു. ശബ്ദംകേട്ട് ഓടിയെത്തിയ നാട്ടുകാരാണു കുട്ടിയെ ആശുപത്രിയില്‍ എത്തിച്ചത്. നാലുവര്‍ഷമായി ആള്‍ താമസമില്ലാത്ത വീടിന്റെ പുകക്കുഴലില്‍ നിന്നു പൊട്ടാത്ത മറ്റു മൂന്നു നാടന്‍ ബോംബുകള്‍ പൊലിസ് കണ്ടെടുത്തു. പൊലിസും ബോംബ് സ്‌ക്വാഡും സ്ഥലത്തെത്തി. പാലപ്പുഴ-പെരുമ്പുന്ന റോഡിനോടു ചേര്‍ന്ന സ്വന്തം റബര്‍തോട്ടത്തില്‍ മെഷീന്‍ ഉപയോഗിച്ച് കാടുവെട്ടിത്തെളിക്കുന്നതിനിടെ ഇന്നലെ രാവിലെ പതിനൊന്നോടെ സ്റ്റീല്‍ ബോംബ് പൊട്ടിയാണു അബ്ദുല്‍റസാഖിനു പരുക്കേറ്റത്. ബോംബില്‍ നിറച്ച കുപ്പിച്ചില്ലുകളും മറ്റും ദേഹമാസകലം തുളച്ചുകയറി. അപകടത്തില്‍ റസാഖിന്റെ വലതു കണ്ണിന്റെ കാഴ്ചയ്ക്കും കേള്‍വിക്കും ഭാഗികമായി തകരാര്‍ സംഭവിച്ചിട്ടുണ്ട്. പ്ലാസ്റ്റിക് കവറില്‍ പൊതിഞ്ഞുവച്ച ബോംബില്‍ മെഷീന്‍ തട്ടിയ ഉടന്‍ പൊട്ടിത്തെറിക്കുകയായിരുന്നു. എറണാകുളത്ത് വ്യാപാരിയായ റസാഖ് കഴിഞ്ഞദിവസമാണു വീട്ടിലെത്തിയത്. പണിമുടക്ക് ദിവസമായതിനാല്‍ സ്വന്തമായി കാട്‌വെട്ടാന്‍ ഇറങ്ങുകയായിരുന്നു. മക്കളും സഹായിയും കൂടെ ഉണ്ടായിരുന്നുവെങ്കിലും പരുക്കേല്‍ക്കാതെ രക്ഷപ്പെട്ടു. സ്‌ഫോടന സ്ഥലത്ത് വലിയ ഗര്‍ത്തം രൂപപ്പെട്ടിട്ടുണ്ട്.