ഡൽഹി: ഡൽഹി വിമാനത്താവളത്തിൽ മലയാളി യുവതിയിൽ നിന്ന് വൻ തുക ടാക്സി ചാർജ് ഈടാക്കിയ സംഭവത്തിൽ മൂന്ന് പേർ പൊലീസ് പിടിയിലായി. വിമാനത്താവളത്തിന്റെ ഒരു ടെർമിനലിൽ നിന്ന് മറ്റൊന്നിലേക്ക് യാത്ര ചെയ്യുന്നതിനായി 4170 രൂപ ഈടാക്കിയ തട്ടിപ്പ് നടത്തിയത് എയർപോർട്ട് ജീവനക്കാരനടക്കം മൂന്നംഗ സംഘമാണെന്ന് പൊലീസ് അറിയിച്ചു.

എയർപോർട്ട് ജീവനക്കാരൻ ലക്കി, സുഹൃത്തുക്കൾ അക്ഷയ് കുമാർ, ശുഭം ശർമ്മ എന്നവരാണ് അറസ്റ്റിലായത്. മലയാളി യുവതി വഫ സിദ്ധീഖ് നൽകിയ പരാതിയുടെ അടിസ്ഥാനത്തിൽ ഡൽഹി പൊലീസ് കേസ് രജിസ്റ്റർ ചെയ്തു.

കേസിനാസ്പദമായ സംഭവം ഫെബ്രുവരി 18നാണ് നടന്നത്. തെറ്റിദ്ധാരണയെ തുടർന്ന് തെറ്റായ ടെർമിനലിൽ ഇറങ്ങിയ യുവതി, സ്ഥിതിഗതികൾ മനസിലാക്കി രണ്ടാം ടെർമിനലിലേക്ക് പോകാൻ ശ്രമിക്കുകയായിരുന്നു. ഈ സമയത്ത് ഇവർ നിർദേശിച്ച ടാക്സിയിൽ 8 കിലോമീറ്റർ യാത്ര ചെയ്തതിന് 4170 രൂപ ഈടാക്കുകയായിരുന്നു.സംഭവത്തിൽ കൂടുതൽ ആളുകൾ പങ്കെടുത്തിട്ടുണ്ടോയെന്ന് അന്വേഷിച്ചുവരികയാണെന്നും അന്വേഷണം തുടരുകയാണെന്നും ഡൽഹി പൊലീസ് അറിയിച്ചു.