ലയണൽ മെസി ഇന്റർ മയാമിയിൽ എത്തിയത് അമേരിക്കൻ ഫുട്ബോളിൽ ഉണ്ടാക്കിയ സ്വാധീനത്തെക്കുറിച്ച് സംസാരിക്കുകയാണ് യുഎസ്എ മാനേജർ  മൗറീഷ്യോ പോച്ചെറ്റിനോ. ഇന്റർ മയാമി ന്യൂസിന് നൽകിയ അഭിമുഖത്തിലാണ് പോച്ചെറ്റിനോ ഇക്കാര്യം പറഞ്ഞത്. 

'ഇതൊരു അവിശ്വസനീയമായ പ്രോജക്റ്റാണ്. ലയണൽ മെസിയെ കിട്ടിയതിൽ ഇന്റർ മയാമിയും എംഎൽഎസും ഭാഗ്യവാന്മാരാണ്. ലോകത്തിലെ ഏറ്റവും മികച്ച കളിക്കാരനാണ് അദ്ദേഹം. മെസി എട്ട് ബാലൺ ഡി ഓർ നേടിയിട്ടുണ്ട്. ഇത് ഫുട്ബോളിലെ വളരെ മികച്ച കാര്യമാണ്.

അദ്ദേഹം ഇവിടെയുള്ളത് അമേരിക്കയെ സംബന്ധിച്ചിടത്തോളം ഒരു മികച്ച പദവി ഉള്ളതുപോലെയാണ്. മെസിയെ ഇവിടെ എത്തിക്കാനായി മയാമി നടത്തിയ ഈ ശ്രമം വളരെ അഭിനന്ദനം അർഹിക്കുന്ന ഒന്നാണ്,' പോച്ചെറ്റിനോ പറഞ്ഞു. 

2023ലാണ് മെസി പിഎസ്ജിയിൽ നിന്നും മയാമിയിൽ എത്തുന്നത്. മെസിയുടെ വരവിനു പിന്നാലെ ലീഗിൽ മിന്നും പ്രകടനമായിരുന്നു മയാമി നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. ഇതുവരെ അമേരിക്കൻ ക്ലബിനൊപ്പം 39 മത്സരങ്ങളിൽ നിന്നും 34 ഗോളുകളും 18 അസിസ്റ്റുകളും ആണ് മെസി നേടിയത്.