ക്വാലാലംപൂർ: അണ്ടർ 19 വനിതാ ലോകകപ്പിൽ ചരിത്രംക്കുറിച്ച് ഇന്ത്യൻ താരം വൈഷ്ണവി ശർമ്മ. മലേഷ്യക്കെതിരായ രണ്ടാം മത്സരത്തിൽ ഹാട്രിക് അടക്കം അഞ്ചു വിക്കറ്റുകൾ നേടിയാണ് വൈഷ്ണവി തിളങ്ങിയത്. നാല് ഓവറിൽ ഒരു മെയ്ഡൻ ഉൾപ്പെടെ അഞ്ചു റൺസ് വഴങ്ങിയാണ് അഞ്ചു വിക്കറ്റുകളാണ് വൈഷ്ണവി നേടിയത്. ഇതോടെ ണ്ടർ 19 വനിതാ ടി-20 ലോകകപ്പിൻ്റെ ചരിത്രത്തിൽ ഹാട്രിക് നേടുന്ന ആദ്യ ഇന്ത്യൻ താരമായി മാറാനും വൈഷ്ണവിക്ക് സാധിച്ചു. 

മത്സരത്തിന്റെ 13ാം ഓവറിലാണ് വൈഷ്ണവിയുടെ ഹാട്രിക് പിറന്നത്. മലേഷ്യൻ താരങ്ങളായ ഐൻ ബിൻ്റി റോസ്‌ലാൻ, നൂർ ഇസ്മ ​​ഡാനിയ, സിതി നസ്‌വ എന്നിവരെ പുറത്താക്കിയാണ് വൈഷ്ണവി ഹാട്രിക് നേടിയത്. അണ്ടർ 19 വനിതാ ടി-20 ലോകകപ്പിൽ ഹാട്രിക് നേടുന്ന രണ്ടാമത്തെ താരം കൂടിയാണ് വൈഷ്ണവി. സൗത്ത് ആഫ്രിക്കയുടെ മാഡിസൺ ലാൻഡ്‌സ്‌മാനാണു ഈ നേട്ടം സ്വന്തമാക്കിയ ആദ്യ താരം. 2023ൽ സ്കോട്ട്ലൻഡിനെതിരെയുള്ള മത്സരത്തിലാണ് ലാൻഡ്സ്മാൻ ഹാട്രിക് നേടിയത്. 

മത്സരത്തിൽ മലേഷ്യയെ 10 വിക്കറ്റുകൾക്കാണ് ഇന്ത്യ പരാജയപ്പെടുത്തിയത്. മത്സരത്തിൽ ആദ്യം ബാറ്റ് ചെയ്ത മലേഷ്യ14.3 ഓവറിൽ 31 റൺസിന്‌ പുറത്താവുകയായിരുന്നു. വിജയലക്ഷ്യം പിന്തുടർന്നിറങ്ങിയ ഇന്ത്യ 2.5 ഓവറിൽ വിക്കറ്റ് ഒന്നും നഷ്ടമാവാതെ ലക്ഷ്യം മറികടക്കുകയായിരുന്നു. നിലവിൽ രണ്ട് മത്സരങ്ങളും വിജയിച്ചുകൊണ്ട് നാല് പോയിന്റോടെ ഗ്രൂപ്പ് എയിൽ ഒന്നാം സ്ഥാനത്താണ് ഇന്ത്യ. ജനുവരി 23ന് നടക്കുന്ന അടുത്ത മത്സരത്തിൽ ശ്രീലങ്കയെയാണ് ഇന്ത്യ നേരിടുക.