അബൂദബി: ലോകത്തിലെ ഏറ്റവും സുരക്ഷിത നഗരമെന്ന പദവി തുടർച്ചയായ ഒൻപതാം വർഷവും അബൂദബിക്ക്. ഓൺലൈൻ ഡേറ്റാബേസ് കമ്പനിയായ നമ്പിയോ പുറത്തിറക്കിയ 2025ലെ റാങ്കിങ്ങിൽ 382 ആഗോള നഗരങ്ങളുൾപ്പെട്ട പട്ടികയിലാണ് അബൂദബി ഒന്നാമതെത്തിയത്. പൗരന്മാരുടെയും താമസക്കാരുടെയും സന്ദർശകരുടെയും ജീവിത നിലവാരം ഉയർത്തുന്നതിലും ഇതിന് ആവശ്യമായ സുരക്ഷാ മാർഗങ്ങളും പദ്ധതികളും സംരംഭങ്ങളും വികസിപ്പിക്കുന്നതിലുമുള്ള മികവാണ് അബൂദബിയെ ഈ നേട്ടത്തിന് അർഹമാക്കിയത്.

സഹിഷ്ണുതയുടെയും സഹവർത്തിത്വത്തിന്റെയും സമാധാനത്തിൻ്റെയും മുല്യങ്ങൾ പകരുന്നത് തുടരുമെന്ന് അബൂദബി പൊലീസ് ഡയറക്‌ടർ ജനറൽ മേജർ ഷെയ്ഖ് മുഹമ്മദ് ബിൻ തഹ്നൂൻ അൽ നഹ്യാൻ വ്യക്തമാക്കി. കൂടാതെ, അബൂദബി പൊലിസിന്റെ ജനറൽ കമാൻഡിനു കീഴിലുള്ള ജീവനക്കാരുടെയും അനുബന്ധ സ്ഥാപനങ്ങളുടെയും പരിശ്രമങ്ങളെയും അദ്ദേഹം അഭിനന്ദിച്ചു.

ഏൽപിച്ച ചുമതലകൾ ഉത്തരവാദിത്തത്തോടെ നിർവഹിച്ചത് പൊലിസ്, ഗതാഗതം, സുരക്ഷാ സേവനങ്ങൾ എന്നിവയുടെ ഗുണനിലവാരം മെച്ചപ്പെടുത്താൻ സഹായിച്ചതായും ചൂണ്ടിക്കാട്ടി. ജീവിത നിലവാരം, സുരക്ഷ, കുറ്റകൃത്യ നിരക്ക്, ഗുണമേന്മയുള്ള ആരോഗ്യസേവനങ്ങൾ, ഉപഭോക്തൃ വിലനിലവാരം എന്നി ഘടകങ്ങളെ അടിസ്ഥാനമാക്കിയായിരുന്നു സർവേ. ഒറ്റയ്ക്ക് നടക്കുമ്പോഴുള്ള സുരക്ഷിതത്വത്തിലും ഒന്നാം സ്‌ഥാനമുണ്ട്. സുരക്ഷിത താമസത്തിനും ജോലി ചെയ്യാനും നിക്ഷേപിക്കാനും ഏറ്റവും അനുയോജ്യമായ ഇടമാണ് അബൂദബിയെന്ന് റിപ്പോർട്ട് വ്യക്തമാക്കുന്നു.

Abu Dhabi, the capital of the United Arab Emirates, has been ranked as the safest city in the world for the ninth consecutive year.