ജിദ്ദ: എല്ലാ ഉംറ തീര്‍ഥാടകരും സഊദിയിലേക്ക് പുറപ്പെടുന്നതിന് കുറഞ്ഞത് 10 ദിവസം മുമ്പ് നിര്‍ബന്ധമായി മെനിഞ്ചൈറ്റിസ് വാക്‌സിന്‍ എടുത്തിരിക്കണമെന്ന് സഊദി ആരോഗ്യ മന്ത്രാലയം അറിയിച്ചു. ഉംറയ്ക്കായി സഊദി അറേബ്യയിലേക്ക് വരുന്നവര്‍ക്കുള്ള ഏറ്റവും പുതിയ ആരോഗ്യ മാര്‍ഗ്ഗനിര്‍ദ്ദേശങ്ങളുടെ ഭാഗമായാണ് നിര്‍ദ്ദേശം. ഫെബ്രുവരി 10 മുതല്‍ നിയമം പ്രാബല്യത്തില്‍ വരുമെന്ന് അധികൃതര്‍ അറിയിച്ചു.

വാക്‌സിന്‍ എടുക്കാതെ വരുന്നവര്‍ക്ക് ഫെബ്രുവരി 10 മുതല്‍ സഊദിയില്‍ പ്രവേശനം അനുവദിക്കില്ല. നിലവില്‍ സഊദിയിലുള്ളവര്‍ക്കും വ്യവസ്ഥ ബാധകമാണ്. സഊദി അറേബ്യയുടെ ആരോഗ്യ ചട്ടങ്ങള്‍ പാലിക്കുന്നുണ്ടെന്ന് ഉറപ്പാക്കാന്‍, എല്ലാ ഉംറ തീർഥാടകരും മെനിംഗോകോക്കല്‍ എസിവൈഡബ്ല്യുഎക്‌സ് വാക്‌സിന്‍ അല്ലെങ്കില്‍ മെനിംഗോകോക്കല്‍ ക്വാഡ്രിവാലന്റ് പോളിസാക്കറൈഡ് വാക്‌സിന്‍ സ്വീകരിക്കേണ്ടതുണ്ട്.

സഊദി അറേബ്യയില്‍ എത്തുന്നതിന് കുറഞ്ഞത് 10 ദിവസം മുമ്പെങ്കിലും വാക്‌സിന്‍ എടുക്കണമെന്നാണ് വ്യവസ്ഥ. ഒരു എല്ലാ രാജ്യങ്ങളില്‍ നിന്നുമുള്ള ഒരു വയസ്സും അതില്‍ കൂടുതലുമുള്ള യാത്രക്കാർക്ക് ഈ നിബന്ധന ബാധകമാണെന്ന് അധികൃതര്‍ വ്യക്തമാക്കി. സ്വന്തം രാജ്യത്തെ ഒഔദ്യോഗിക ആരോഗ്യ കേന്ദ്രത്തില്‍ നിന്നായിരിക്കണം തീര്‍ഥാടകന്‍ വാക്‌സിന്‍ എടുക്കേണ്ടത്

യാത്രക്കാരൻ്റെ വാക്‌സിനേഷന്‍ സര്‍ട്ടിഫിക്കറ്റില്‍ പേര്, തരം, നല്‍കിയ തീയതി എന്നിവ വ്യക്തമായി രേഖപ്പെടുത്തണമെന്നും നിര്‍ദ്ദേശമുണ്ട്. മെനിഞ്ചൈറ്റിസ് വാക്‌സിന്‍ സര്‍ട്ടിഫിക്കറ്റിന് മൂന്ന് വര്‍ഷം കാലാവധി ഉണ്ടായിരിക്കുമന്ന് അധികൃതര്‍ അറിയിച്ചു. ലോകാരോഗ്യ സംഘടനയുടെ അഭിപ്രായ പ്രകാരം, തലച്ചോറിനും സുഷുമ്‌നാ നാഡിക്കും ചുറ്റുമുള്ള ടിഷ്യൂകളുടെ വീക്കമാണ് മെനിഞ്ചൈറ്റിസ്. അണുബാധ മൂലമാണ് സാധാരണയായി ഇത് സംഭവിക്കുന്നത്. എന്നാൽ, ഇത് ചിലപ്പോള്‍ മാരകമാകാൻ സാധ്യതയുണ്ട്.

രോഗികള്‍ക്ക് അടിയന്തിര വൈദ്യസഹായം ആവശ്യമാണ്. ബാക്ടീരിയ, വൈറസുകള്‍, ഫംഗസ് എന്നീ രോ​ഗകാരികളാൽ ഈ രോഗം ഉണ്ടാകാം. ഇതില്‍ ബാക്ടീരിയ മെനിഞ്ചൈറ്റിസ് ഇതിന്റെ ഏറ്റവും കഠിനമായ രൂപമാണ്. മെനിഞ്ചൈറ്റിസ് പ്രധാനമായും രോഗബാധിതനായ വ്യക്തിയുടെ ശ്വാസത്തിലൂടെയാണ് പകരുന്നത്. കഴുത്തിലെ തടിപ്പ്, പനി, അസ്വസ്ഥമായ മാനസികാവസ്ഥ, തലവേദന, ഓാക്കാനം, ഛര്‍ദ്ദി എന്നിവയാണ് മെനിഞ്ചൈറ്റിസിന്റെ പ്രധാന ലക്ഷണങ്ങള്‍.

ചിലപ്പോള്‍ രോഗം മരണകാരണം ആവാമെന്നതിനാല്‍ തുടക്കത്തില്‍ തന്നെ വൈദ്യസഹായം തേടേണ്ടത് അത്യാവശ്യമാണ്. വാക്‌സിന്‍ രോഗം പകരുന്നത് വലിയ അളവില്‍ പ്രതിരോധിക്കാന്‍ പര്യാപ്തമാണെന്നാണ് വിലയിരുത്തപ്പെടുന്നത്.

ഉംറ വീസക്കാർ വാക്‌സിനേഷൻ എടുക്കണമെന്ന് നേരത്തെ സഊദി സിവിൽ എവിയേഷൻ അറിയിച്ചിരുന്നു. ഇതുമായി ബന്ധപ്പെട്ട് സ്വകാര്യ വിമാന കമ്പനികൾ ഉൾപ്പെടെ സഊദി അറേബ്യയിലെ വിമാനത്താവളങ്ങളിൽ സർവിസ് നടത്തുന്ന എല്ലാ കമ്പനികൾക്കും ജനറൽ അതോറിറ്റി ഓഫ് സിവിൽ എവിയേഷൻ (ഗാക) സർക്കുലർ അയച്ചിരുന്നു.

Saudi Arabia introduces a new regulation making meningitis vaccination compulsory for Umrah pilgrims, effective February 10, to ensure public health and safety.