ലഖ്​നൗ: ഉത്തരവുുകൾക്കു മേൽ ഉത്തരവുകളുമായി രാജ്യത്തെ പരമോന്നത നീതി പീഠം തന്നെ രം​ഗത്തെത്തിയിട്ടും യാതൊരു കുലുക്കവുമില്ലാതെ ഉത്തർപ്രദേശിൽ വീണ്ടും ബുൾഡോസർരാജുമായി രം​ഗത്തെത്തിയിരിക്കുകയാണ് യോ​ഗി സർക്കാർ. കഴിഞ്ഞ ദിവസം സംസ്ഥാനത്തെ ഒരു പ്രമുഖ മുസ്‌ലിം പള്ളി അധികൃതർ പൊളിച്ചു നീക്കാൻ തുടങ്ങിയിരിക്കുന്നു. പതിവുപോലെ അനധികൃത കയ്യേറ്റം ആരോപിച്ചാണ് നടപടി. 

സർക്കാർ ഭൂമി കൈയേറി നിർമിച്ചെന്നാരോപിച്ച്​ കുശിനഗർ ജില്ലയിലെ ഹത്ത മേഖലയിലെ മദനി മസ്​ജിദിൻറെ ഭാഗമാണ്​ ഞായറാഴ്ച പൊളിച്ചുനീക്കാൻ തുടങ്ങിയത്​. പള്ളി പൊളിക്കുന്നതിനെതിരെയുണ്ടായിരുന്ന ഹൈക്കോടതിയുടെ സ്റ്റേ കാലാവധി കഴിഞ്ഞതിന് പിന്നാലെയാണ് പൊളിച്ചു നീക്കൽ പ്രക്രിയ പുനഃരാരംഭിച്ചത്.  ശനിയാഴ്ചയാണ് സ്റ്റേയുടെ സമയപരിധി അവസാനിച്ചത്. 

കനത്ത പൊലീസ്​ സുരക്ഷയിലായിരുന്നു പൊളിക്കൽ നടപടി. കുശിനഗർ എസ്പി സന്തോഷ്​ മിശ്രയുടെ നേതൃത്വത്തിൽകനത്ത പൊലിസ് സന്നാഹവും ബിഎസ്​എഫും സ്ഥലത്തുണ്ടായിരുന്നു. പള്ളിയുടെ ചുറ്റും ബാരിക്കേഡുകൾ സ്​ഥാപിക്കുകയും ചെയ്തിരുന്നു.

സർക്കാർ‌ ഭൂമി കയ്യേറിയാണ് പള്ളി നിർമിച്ചതെന്ന്​ ആരോപിച്ച്​ ഹിന്ദുത്വ പ്രവർത്തകർ 2024 ഡിസംബർ 18നാണ്​ ഉത്തർ പ്രദേശ്​ മുഖ്യമന്ത്രിയുടെ പോർട്ടൽ വഴി പരാതി നൽകിയത്​. എന്നാൽ, 15 വർഷം മുമ്പ്​ 33 സെൻറ്​ ഭൂമി പള്ളി നിർമാണത്തിന്​ ​​വേണ്ടി വാങ്ങിയതാണെന്ന്​ മസ്​ജിദ്​ കമ്മിറ്റി അന്ന് മറുപടി നൽകിയിരുന്നു.

എന്നാൽ മറുപടി വകവെക്കാതെ പരാതിക്ക്​ പിന്നാലെ ജില്ലാ അധികൃതർ സർവേ നടത്തുകയും പള്ളിയുടെ ഒരു ഭാഗം സർക്കാർ ഭൂമിയിലാണ്​ നിൽക്കുന്നതെന്ന നിഗമനത്തിലെത്തുകയും ചെയ്തു. തുടർന്ന് അംഗീകൃത പ്രോപ്പർട്ടി മാപ്പിൻറെ യഥാർത്ഥ പകർപ്പ് ഹാജരാക്കാൻ പള്ളി കമ്മിറ്റിയോട് അധികൃതർ ആവശ്യപ്പെട്ടു. മുനിസിപ്പൽ റെക്കോർഡ് ഉദ്യോഗസ്ഥർക്ക് ഈ മാപ്പ്​​ കണ്ടെത്താനായില്ല. അതുകൊണ്ട് തന്നെ  ഈ രേഖ പള്ളി കമ്മിറ്റിക്കും ഹാജരാക്കാൻ കഴിഞ്ഞില്ല. ഇതേതുടർന്ന്​ സർക്കാർ ഭൂമി വ്യാജ രേഖ ഉപയോഗിച്ച്​ കൈവശപ്പെടുത്തിയെന്ന്​ കാണിച്ച്​ മസ്ജിദ് കമ്മിറ്റിയിലെ മൂന്ന് പേർക്കെതിരെ കേസെടുത്തു.

അതേസമയം, പള്ളിക്കെതിരെ ബുൾഡോസർ നടപടി സുപ്രിംകോടതി മാർഗനിർദേശങ്ങളുടെ ലംഘനമാണെന്ന്​ മസ്ജിദ് കമ്മിറ്റി പ്രതിനിധി സെയ്ഫുല്ല ഖാൻ ചൂണ്ടിക്കാട്ടി. കൈയേറിയെന്ന ആരോപണത്തിൽ കൃത്യമായ മറുപടി അധികൃതർക്ക്​ നൽകിയിട്ടുണ്ട്. മാത്രമല്ല പള്ളി പൊളിക്കുന്നത്​ സംബന്ധിച്ച ഉത്തരവ്​ ഞങ്ങൾ ചോദിച്ചെങ്കിലും അവരത്​ കാണിച്ചിട്ടില്ല.  കൂടാതെ മുൻ ജില്ലാ മജിസ്‌ട്രേറ്റ് ഭൂമി അളന്ന് തിട്ടപ്പെടുത്തിയതുമാണ്​. 33 സെൻറ്​ ഭൂമി പള്ളിയുടേതാണെന്നും 29 സെൻറ്​ ഭൂമിയിലാണ് പള്ളി സ്ഥിതി ചെയ്യുന്നതെന്നുമാണ്​​ അന്ന്ക ണ്ടെത്തിയിട്ടുള്ളത്​​. ബി.ജെ.പിയുടെ ലെറ്റർഹെഡിൽ ആരെങ്കിലും പരാതി നൽുന്നതോടെ ഉടൻ തന്നെ മതപരമായ കെട്ടിടങ്ങൾ പൊളിക്കുക എന്നതാണ് ഇപ്പോൾ നടക്കുന്നത്. ഇത് ന​ഗ്നമായ അനീതിയാണ്- അദ്ദേഹം ചൂണ്ടിക്കാട്ടി. 

In Uttar Pradesh, the state government, under Yogi Adityanath's leadership, has resumed the demolition of a prominent mosque in Kushinagar.