കൊച്ചി: സി.എസ്.ആര്‍ ഫണ്ടുപയോഗിച്ച് പകുതി വിലയ്ക്ക് ഇരുചക്ര വാഹനമടക്കം നല്‍കാമെന്ന് പറഞ്ഞ് തട്ടിപ്പ് നടത്തിയ കേസില്‍ പ്രതി അനന്തുകൃഷ്ണന് ജാമ്യമില്ല. മൂവാറ്റുപുഴ ജുഡീഷ്യല്‍ ഫസ്റ്റ് ക്ലാസ് മജിസ്ട്രേറ്റ് കോടതിയാണ് ഇയാളുടെ ജാമ്യാപേക്ഷ തള്ളിയത്. അനന്തു പ്രഥമദൃഷ്ട്യാ കുറ്റക്കാരനാണെന്നും ജാമ്യം നല്‍കിയാല്‍ തെളിവ് നശിപ്പിക്കാന്‍ സാധ്യതയുണ്ടെന്നും ഒളിവില്‍ പോകാനും സാക്ഷികളെ സ്വാധീനിക്കാനും സാധ്യതയുണ്ടെന്നും കോടതി നിരീക്ഷിച്ചു. അനന്തുകൃഷ്ണനെതിരെ മറ്റ് സ്റ്റേഷനുകളിലും കേസുണ്ടെന്നും കോടതി ചൂണ്ടിക്കാട്ടി. 

എന്‍.ജി.ഒ കോണ്‍ഫെഡറേഷന്റെ പേരില്‍ വിവിധ സര്‍ക്കാരിതര സംഘടനകളുടെയും സന്നദ്ധ സംഘടനകളുടെയും ചാരിറ്റബിള്‍ സൊസൈറ്റികളുടെയും കൂട്ടായ്മ രൂപീകരിച്ച് ഇരുചക്രവാഹനം, ലാപ്ടോപ്, തയ്യല്‍ മെഷീന്‍, ഗൃഹോപകരണം എന്നിവ പകുതി വിലയ്ക്ക് നല്‍കാമെന്ന് വ്ഗ്ദാനം നല്‍കിയാണ് സംസ്ഥാനമാകെ കോടികളുടെ തട്ടിപ്പ് നടത്തിയത്.

അഞ്ച് ദിവസത്തെ പൊലിസ് കസ്റ്റഡിക്ക് ശേഷം കോടതിയില്‍ ഹാജരാക്കിയ അനന്തുകൃഷ്ണനെ മൂവാറ്റുപുഴ ജുഡീഷ്യല്‍ ഫസ്റ്റ് ക്ലാസ്സ് മജിസ്ട്രേറ്റ് കോടതി ഇന്നലെ റിമാന്‍ഡ് ചെയ്തിരുന്നു. കഴിഞ്ഞ വ്യാഴാഴ്ച കസ്റ്റഡിയില്‍ വാങ്ങിയ അനന്തുകൃഷ്ണനെ കൊച്ചിയിലും ഇടുക്കിയിലുമെത്തിച്ച് തെളിവെടുപ്പ് നടത്തിയിരുന്നു. പ്രതിയുടെ രാഷ്ട്രീയ ബന്ധങ്ങളും പൊലിസ് അന്വേഷിച്ച് വരികയാണ്. 

സമാന കേസില്‍ വണ്ടന്‍മേട് പൊലിസ് അനന്തുകൃഷ്ണന്റെ അറസ്റ്റ് രേഖപ്പെടുത്തി. മൂവാറ്റുപുഴ ജയിലില്‍ എത്തിയാണ് വണ്ടന്‍മേട് പൊലിസ് പ്രതിയുടെ രേഖപ്പെടുത്തിയത്.