ഫുട്ബോളിലെ തന്റെ പ്രിയപ്പെട്ട താരങ്ങളെ തെരഞ്ഞെടുത്തിരിക്കുകയാണ് മാഞ്ചസ്റ്റർ യുണൈറ്റഡ് ഇതിഹാസം ദിമിതാർ ബെർബെറ്റോവ്. ബെർണാർഡോ സിൽവ, ഹാരി കെയ്ൻ, റോബർട്ട് ലെവൻഡോവ്സ്‌കി, കെവിൻ ഡി ബ്രൂയ്‌ൻ, ലയണൽ മെസി എന്നിവരെയാണ് റെഡ് ഡെവിൾസ് ഇതിഹാസം പ്രിയ താരങ്ങളായി തെരഞ്ഞെടുത്തത്. ഗോളിന് നൽകിയ അഭിമുഖത്തിൽ സംസാരിക്കുകയായിരുന്നു ബെർബെറ്റോവ്. 

'ബെർണാർഡോ സിൽവക്ക് ഞാൻ അഞ്ചാം സ്ഥാനം നൽകും. കാരണം അദ്ദേഹം പന്ത് കൺട്രോൾ ചെയ്യാൻ മിടുക്കനാണ്. അദ്ദേഹത്തിന് എങ്ങനെ കളിക്കണമെന്ന് നന്നായി അറിയാം. ഇപ്പോഴും നല്ല രീതിയിൽ സ്കോർ ചെയ്യുന്നതിനാൽ ഞാൻ ഹാരി കെയ്‌നിനെ നാലാമതായി  തെരഞ്ഞെടുക്കും. മൂന്നാം സ്ഥാനം ഞാൻ ലെവൻഡോവ്‌സികിക്ക് നൽകും. ​​കാരണം അദ്ദേഹം ഇപ്പോഴും ഗോളുകൾ നേടുന്നുണ്ട്. രണ്ടാമതായി ഞാൻ കെവിൻ ഡി ബ്രൂയ്‌ന്റെ പേര് പറയും. അവന് മത്സരം കൃത്യമായി വായിച്ചെടുക്കാൻ കഴിയും. ഒന്നാമതായി ഞാൻ മെസിയെ പറയും. അദ്ദേഹം ഇപ്പോഴും മയാമിയിൽ നന്നായി കളിക്കുന്നുണ്ട്. ഒരു സമ്മർദവും ഇല്ലാതെ അവന് കളിക്കാൻ സാധിക്കും,' ബെർബെറ്റോവ് പറഞ്ഞു. 

ബെർബെറ്റോവ് ക്രിസ്റ്റ്യാനോ റൊണാൾഡോയെ തെരഞ്ഞെടുക്കാത്തത്‌ ഏറെ ശ്രേദ്ധേയമായി. മാഞ്ചസ്റ്റർ യുണൈറ്റഡിൽ റൊണാൾഡൊക്കൊപ്പം ഒരുമിച്ച്   ബെർബെറ്റോവ് കളിച്ചിട്ടുണ്ട്. മാഞ്ചസ്റ്റർ യുണൈറ്റഡിൽ റൊണാൾഡോക്കൊപ്പം 39 മത്സരങ്ങളിലാണ് താരം കളിച്ചിട്ടുള്ളത്. ഇരുവരും ഒരുമിച്ച് അഞ്ചു ഗോളുകളും നേടിയിട്ടുണ്ട്. റൊണാൾഡോ നിലവിൽ തന്റെ ൪൦ വയസിലും പ്രായത്തെ വെല്ലുന്ന പോരാട്ടമാണ് നടത്തിക്കൊണ്ടിരിക്കുന്നത്. നിലവിൽ സഊദി ക്ലബായ അൽ നാസറിന്റെ താരമാണ് റൊണാൾഡോ. ഈ സീസണിൽ 26 മത്സരങ്ങളിൽ നിന്നും 24 ഗോളുകളും നാല് അസിസ്റ്റുകളുമാണ് റൊണാൾഡോ നേടിയിട്ടുള്ളത്.