ന്യൂഡല്‍ഹി: ബിബിസി ഇന്ത്യയുടെ അഭിമുഖത്തിനിടെ ജുഡീഷ്യറിയിലെ രാഷ്ട്രീയ ഇടപെടല്‍, തന്റെ വീട്ടിലെ പ്രധാനമന്ത്രി നരേന്ദ്ര മോദിയുടെ വിവാദ സന്ദര്‍ശനം തുടങ്ങി വിവിധ വിഷയങ്ങളില്‍ കടുത്ത ചോദ്യങ്ങള്‍ നേരിട്ട് മുന്‍ ചീഫ് ജസ്റ്റിസ് ഡി വൈ ചന്ദ്രചൂഡ്.

സ്റ്റീഫന്‍ സാക്കൂറുമായുള്ള അഭിമുഖത്തിനിടെ, രാമക്ഷേത്ര വിധി, ആര്‍ട്ടിക്കിള്‍ 370 റദ്ദാക്കല്‍, പൗരത്വ ഭേദഗതി നിയമം (സിഎഎ) തുടങ്ങിയ വിവാദ കേസുകളെക്കുറിച്ച് സംസാരിച്ച അദ്ദേഹം നിയമപരമായ സ്വാതന്ത്ര്യത്തിനും രാഷ്ട്രീയ യാഥാര്‍ത്ഥ്യങ്ങള്‍ക്കും ഇടയിലുള്ള സൂക്ഷ്മമായ സന്തുലിതാവസ്ഥയെക്കുറിച്ച് ശക്തമായ തന്റെ നിരീക്ഷണങ്ങള്‍ വ്യക്തമാക്കുകയും ചെയ്തു. വെല്ലുവിളികള്‍ക്കിടയിലും, നിയമവാഴ്ച ഉയര്‍ത്തിപ്പിടിക്കുന്നതിനും ഓരോ പൗരന്റെയും അവകാശങ്ങള്‍ സംരക്ഷിക്കപ്പെടുന്നുണ്ടെന്ന് ഉറപ്പാക്കുന്നതിനും ജനാധിപത്യത്തിന്റെ ഒരു സ്തംഭമെന്ന നിലയിലുള്ള അതിന്റെ പദവി ശക്തിപ്പെടുത്തുന്നതിനും ജുഡീഷ്യറി പ്രതിജ്ഞാബദ്ധമാണെന്ന് മുന്‍ ചീഫ് ജസ്റ്റിസ് അടിവരയിട്ടു.

ഇന്ത്യയിലെ ഉന്നത കോടതികള്‍, പ്രത്യേകിച്ച് സുപ്രീം കോടതി, വ്യക്തി സ്വാതന്ത്ര്യങ്ങള്‍ സംരക്ഷിക്കുന്നതിനാണ് ഇവിടെയുള്ളതെന്ന വ്യക്തമായ സന്ദേശം നല്‍കിയിട്ടുണ്ടെന്നും അതുകൊണ്ടാണ് ജുഡീഷ്യറിയില്‍ ജനങ്ങളുടെ വിശ്വാസം ഇപ്പോഴും നിലനില്‍ക്കുന്നതെന്നും അദ്ദേഹം ആവര്‍ത്തിച്ചു. ഇന്ത്യന്‍ നീതിന്യായ വ്യവസ്ഥയില്‍ താങ്കളെപ്പോലുള്ള വരേണ്യ, പുരുഷ, ഉയര്‍ന്ന ജാതി ഹിന്ദുക്കള്‍ ആധിപത്യം പുലര്‍ത്തുന്ന ഒരു വാഴ്ചാ പ്രശ്‌നമുണ്ടോ എന്ന് ചോദിച്ചപ്പോള്‍, ഡി.വൈ ചന്ദ്രചൂഡ് ആ ആശയത്തെ ശക്തമായി നിരസിക്കുകയാണുണ്ടായത്.

'വിദ്യാഭ്യാസത്തിന്റെ, പ്രത്യേകിച്ച് നിയമ വിദ്യാഭ്യാസത്തിന്റെ, വ്യാപ്തി സ്ത്രീകളിലേക്ക് എത്തിയതോടെ, നിയമ സ്‌കൂളുകളില്‍ നിങ്ങള്‍ കാണുന്ന ലിംഗ സന്തുലിതാവസ്ഥ ഇപ്പോള്‍ ഇന്ത്യന്‍ ജുഡീഷ്യറിയുടെ ഏറ്റവും താഴ്ന്ന തലങ്ങളിലും പ്രതിഫലിക്കുന്നു. ലിംഗ സന്തുലിതാവസ്ഥയെ സംബന്ധിച്ചിടത്തോളം, ജില്ലാ ജുഡീഷ്യറിയിലേക്ക് സ്ത്രീകളുടെ എണ്ണം വര്‍ധിച്ചുകൊണ്ടിരിക്കുകയാണ്. ഇവര്‍ കൂടുതല്‍ മുന്നേറും,' അദ്ദേഹം പറഞ്ഞു.

ഇന്ത്യയുടെ ചീഫ് ജസ്റ്റിസായിരിക്കുന്നിടത്തോളം കാലം ഒരു കോടതിയിലും പ്രവേശിക്കരുതെന്ന് തന്റെ പിതാവ് മുന്‍ ചീഫ് ജസ്റ്റിസ് വൈ വി ചന്ദ്രചൂഡ് തന്നോട് പറഞ്ഞതായി മുന്‍ ചീഫ് ജസ്റ്റിസ് വെളിപ്പെടുത്തി.

തന്റെ ഔദ്യോഗിക കാലത്ത് രാഷ്ട്രീയ സമ്മര്‍ദ്ദം നേരിട്ടോ എന്ന ചോദ്യം ഡി വൈ ചന്ദ്രചൂഡ് തള്ളിക്കളഞ്ഞു. .ഭരണകക്ഷിയായ ബിജെപി സ്വന്തം താല്‍പ്പര്യങ്ങള്‍ സംരക്ഷിക്കാന്‍ കോടതികളെ ചൂഷണം ചെയ്യുന്നുവെന്ന് രാഷ്ട്രീയ എതിരാളികള്‍ ആരോപിച്ചതായി അവകാശപ്പെടുന്ന ന്യൂയോര്‍ക്ക് ടൈംസിന്റെ എഡിറ്റോറിയല്‍ സക്കൂര്‍ ഉദ്ധരിച്ചെങ്കിലും ഇത് അംഗീകരിക്കാന്‍ ചന്ദ്രചൂഡ് തയ്യാറായില്ല.