തിരുവനന്തപുരം: യുഡിഎഫും കോൺഗ്രസും നാടിൻ്റെ മുന്നേറ്റത്തിൽ ഒപ്പം നിൽക്കാൻ തയാറാകുന്നില്ലെന്ന് മുഖ്യമന്ത്രി പിണറായി വിജയൻ. കേരളത്തിലെ വ്യവസായ മേഖലയുടെ വളർച്ചയെ പ്രകീർത്തിച്ച ശശി തരൂരിനെ പിന്തുണച്ച് നടത്തിയ പ്രസംഗത്തിലായിരുന്നു മുഖ്യമന്ത്രി ഇങ്ങനെ പറഞ്ഞത്. കോൺഗ്രസ് നേതാവായ ശശി തരൂർ ഒരു ലേഖനത്തിലൂടെ കേരളത്തിലെ പുരോഗതിയെ കുറിച്ച് അനുമോദിക്കുകയാണ് ചെയ്‌തത്‌. അദ്ദേഹത്തിന്റെ അഭിനന്ദനം എന്തു പുകിലാണ് കോൺഗ്രസിലുണ്ടാക്കിയതെന്നും, വസ്‌തുത മറച്ചുപിടിക്കുകയാണ് കോൺഗ്രസെന്നും മുഖ്യമന്ത്രി പറഞ്ഞു.

കോൺഗ്രസുകാർ സ്‌ഥാപിക്കാൻ ശ്രമിക്കുന്ന കാര്യങ്ങൾ പൊളിഞ്ഞു പോവുകയാണുണ്ടായതെന്നും, കേരളം നിക്ഷേപ സൗഹൃദമല്ലെന്ന നിലപാടു സ്വീകരിക്കാൻ എങ്ങനെയാണ് പ്രതിപക്ഷ നേതാവിന് കഴിയുന്നതെന്നും മുഖ്യമന്ത്രി ചോദിച്ചു. നാടിൻ്റെ മേൻമ അംഗീകരിക്കാൻ അവർക്ക് കഴിയുന്നില്ല. നാടിനെ ശത്രുതയോടെ കാണുകയാണ്. എൽഡിഎഫിനോട് വിരോധമാവാമെന്നും, അത് നാടിനോടും ജനങ്ങളോടും ആകരുതെന്നും മുഖ്യമന്ത്രി പറഞ്ഞു.

ജനങ്ങളെ തെറ്റിദ്ധരിപ്പിക്കാനുള്ള ശ്രമമാണ് നടക്കുന്നത്, അതിനെതിരെ ജാഗ്രതയോടെ മുന്നോട്ടു പോകണം. തരൂർ കേരളത്തെ പ്രശംസിച്ചത് സംസ്ഥാനം നേടിയ പൊതു പുരോഗതി, ഐടി സ്‌റ്റാർട്ടപ്പ് രംഗത്തെ നേട്ടം ഇവ ചൂണ്ടികാട്ടിയാണ്. യുഡിഎഫ് ഭരണകാലത്താണ് നാടിനു തകർച്ച സംഭവിച്ചത്. അന്ന് വികസന പ്രവർത്തനങ്ങളൊന്നും നടന്നിരുന്നില്ല. ഇന്ന് ദുരന്ത സമയങ്ങളിലെല്ലാം സംസ്‌ഥാന സർക്കാർ ജനങ്ങൾക്കൊപ്പം നിന്നു. ആളുകൾ ഒത്തൊരുമിച്ചു നിന്നു പോരാടി. ഓരോ മേഖലയിലെയും പുരോഗതി നമ്മൾ കണ്ടുവെന്നും മുഖ്യമന്ത്രി പറഞ്ഞു.

Kerala Chief Minister Pinarayi Vijayan criticized the Congress party, saying that opposition to the Left Democratic Front (LDF) should not be misconstrued as opposition to the state and its people