ഫലസ്തീനികളെന്ന് തെറ്റിദ്ധരിച്ച് പിതാവിനും മകനും നേരെ വെടിയുതിർത്ത് യു.എസ് പൗരൻ. യു.എസിലെ മിയാമിയിൽ ബീച്ചിലാണ് സംഭവം. ഫലസ്തീനികളാണെന്ന് കരുതിയാണ് വെടിയുതിർത്തതെന്ന് ഇയാൾ പിന്നീട് പൊലിസിനോട് പറയുകയായിരുന്നു. മൊർദേചൈയ് ബ്രാഫ്മാൻ എന്നാണ് പ്രതിയുടെ പേര്. 

'ട്രക്ക് ഓടിച്ചു പോവുമ്പോൾ രണ്ടു പേരെ കണ്ടു. അവർ ഫലസ്തിനികളാണെന്ന് തോന്നി. അവർക്ക് നേരെ വെടിയുതിർത്തു. രണ്ടു പേരേയും കൊന്നു' നിസ്സാരമായാണ് അയാൾ പൊലിസിനോട് ഇങ്ങനെ പ്രതികരിച്ചത്. ഇരകളുടെ വാഹനത്തിന് നേരെ 17 തവണയാണ് അക്രമി വെടിയുതിർത്തത്. യാതൊരു പ്രകോപനവുമില്ലാതെയായിരുന്നു നടപടി. 

ഒരാളുടെ ഷോൾഡറിലാണ് വെടിയുണ്ട തുളഞ്ഞു കയറിയത്. മറ്റെയാളുടെ കയ്യിലും വെടിയുണ്ട പരുക്കേൽപിച്ചു. ഇവരെ ആശുപത്രിയിൽ പ്രവേശിപ്പിച്ചിരിക്കുകയാണ്. അതേസമയം ഇവർ ഫല്സതീനികളാണോ എന്ന കാര്യം പൊലിസ് വെളിപെടുത്തിയിട്ടില്ല. ഇസ്റാഈലിൽ നിന്ന് സന്ദർശനത്തിനെത്തിയവരാണെന്ന് മാത്രമാണ് പൊലിസ് വ്യക്തമാക്കിയിരിക്കുന്നത്. അതേസമയം, @South_Florida_Simchas എന്ന ഇൻസ്റ്റാഗ്രാം അക്കൗണ്ട് ഇവരുടെ ചിത്രം പങ്കുവെച്ച് ഇസ്റാഈലി അച്ഛനും മകനുമെന്ന് പോസ്റ്റ് ഇട്ടിട്ടുണ്ട്. 

ബ്രാഫ്മാന് മേൽ ഫെഡറൽ വിദ്വേഷ കുറ്റകൃത്യങ്ങൾ ചുമത്തണമെന്ന് സംസ്ഥാനത്തെ ഏറ്റവും വലിയ മുസ്ലിം പൗരാവകാശ, അഭിഭാഷക സംഘടനയായ കൗൺസിൽ ഓൺ അമേരിക്കൻ ഇസ്  ലാക് റിലേഷൻസിന്റെ (CAIR-Florida) ഫ്ളോറിഡ ചാപ്റ്റർ ആവശ്യപ്പെട്ടു.

ഗസ്സയിൽ ഇസ്റാഈൽ ആക്രമണം ആരംഭിച്ച ശേഷം നിരവധി അതിക്രമങ്ങളാണ് അമേരിക്കയിൽ ഫലസ്തീനികൾക്ക് നേരെ റിപ്പോർട്ട് ചെയ്യപ്പെട്ടിട്ടുള്ളത്. ടെക്സാസിൽ വെറും മൂന്നു വയസ്സുള്ള ഒരു പെൺകുഞ്ഞിനെ 41കാരിയായ അമേരിക്കൻ വംശജ വെള്ളത്തിൽ മുക്കി കൊല്ലാൻ ശ്രമിച്ചത് അതിലൊന്നായിരുന്നു.