വാഷിങ്ടണ്‍: യു.എസില്‍ നിന്നും നാടുകടത്തുന്ന  അനധികൃത കുടിയേറ്റക്കാരെ ചങ്ങലയില്‍ ബന്ധിച്ച് വിമാനത്തിലേക്ക് കൊണ്ടു പോകുന്നതിന്റെ ദൃശ്യങ്ങള്‍ വൈറ്റ്ഹൗസ് പുറത്തുവിട്ടു.കൈയിലും കാലിലും ചങ്ങല ബന്ധിച്ച് വിമാനത്തില്‍ കയറ്റുന്ന 41 സെക്കന്‍ഡ് ദൈര്‍ഘ്യമുള്ള വീഡിയോ  ഔദ്യോഗിക എക്‌സ് പേജിലാണ് വൈറ്റ്ഹൗസ് പുറത്തുവിട്ടത്. ക്രൂരമായ ചങ്ങലയില്‍ ബന്ധിച്ച് യുദ്ധവിമാനങ്ങളില്‍ കുടിയേറ്റക്കാരെ തിരിച്ചയക്കുന്നതിനെതിരെ വിവിധ രാജ്യങ്ങള്‍ പ്രതിഷേധം ശക്തമാക്കുന്നതിനിടെയാണ് യുഎസിന്റെ പ്രകോപനപരമായ നടപടി. 

'ഹഹ വൗ' എന്ന കമന്റോടെ ഇലോണ്‍ മസ്‌കും ഈ ദൃശ്യങ്ങള്‍ പങ്കുവെച്ചു. ട്രംപ് ഭരണകൂടത്തിലെ ഡോജ് മേധാവി ഇലോണ്‍ മസ്‌ക് ഈ ദൃശ്യങ്ങള്‍ പങ്കുവെച്ച പോസ്റ്റിന് നല്‍കിയ തലക്കെട്ടും വലിയ പ്രതിഷേധത്തിന് കാരണമായി.

ഇതേ രൂപത്തില്‍ യു.എസ് സൈനിക വിമാനങ്ങളില്‍ അനധികൃത കുടിയേറ്റക്കാരെ ഇന്ത്യയിലേക്ക് നാടുകടത്തുന്നത് തുടരുമെന്നാണ് സൂചന. കുടിയേറിയവരെ സൈനിക വിമാനത്തില്‍ തിരിച്ചയയ്ക്കുന്നതിന് നല്‍കിയ അനുമതി ഇന്ത്യ പുനപരിശോധിക്കില്ലെന്നും റിപ്പോര്‍ട്ടുകള്‍ വ്യക്തമാക്കുന്നു. ആയിരക്കണക്കിനാളുകള്‍ ഇക്കൊല്ലം തിരിച്ചെത്താന്‍ സാധ്യതയുണ്ടെന്നും ഓരോ മാസവും നാലഞ്ച് വിമാനങ്ങള്‍ പ്രതീക്ഷിക്കണമെന്നും കേന്ദ്രവൃത്തങ്ങള്‍ അറിയിക്കുന്നതായും സൂചനയുണ്ട്. ചില ഇന്ത്യക്കാരെ കോസ്റ്റോറിക്കയില്‍ ഇറക്കിയതായും റിപ്പോര്‍ട്ടുണ്ട്.

അതിനിടെ മുന്നൂറിലധികം അനധികൃത കുടിയേറ്റക്കാരെ പനാമയിലേക്ക് ട്രംപ് ഭരണകൂടം നാടുകടത്തിയിട്ടുണ്ട്. മറ്റ് രാജ്യങ്ങള്‍ സ്വീകരിക്കാത്തവരാണ് ഇവരില്‍ അധികവുമെന്നാണ് സൂചന. അഫ്ഗാനിസ്ഥാന്‍, ഇറാന്‍, ചൈന എന്നീ രാജ്യങ്ങളില്‍ നിന്നുള്ളവര്‍ ഇതില്‍ ഉള്‍പ്പെടും.

ASMR: Illegal Alien Deportation Flight 🔊 pic.twitter.com/O6L1iYt9b4

— The White House (@WhiteHouse) February 18, 2025