റിയാദ്: സഊദിയില്‍ എയ്ഡ്‌സ് വ്യാപിക്കുന്നുണ്ടെന്ന തരത്തിലുള്ള പ്രചാരണം തെറ്റാണെന്നും ഒറ്റപ്പെട്ട കേസുകളാണ് കണ്ടെത്തുന്നതെന്നും വ്യാജ പ്രചാരണമാണ് നിലവില്‍ നടക്കുന്നതെന്നും ആരോഗ്യ മന്ത്രാലയം അണ്ടര്‍ സെക്രട്ടറി ഡോ. അബ്ദുല്ല അസീരി വ്യക്തമാക്കി. രാജ്യത്ത് ആര്‍ക്കെങ്കിലും എയ്ഡ്‌സ് ബാധയുണ്ടെന്ന് കണ്ടെത്തിക്കഴിഞ്ഞാല്‍ ആവശ്യമായ മുന്‍കരുതലുകള്‍ എടുക്കുന്നുണ്ടെന്നും അദ്ദേഹം കൂട്ടിച്ചേര്‍ത്തു. ഇതുമായി ബന്ധപ്പെട്ട് പ്രചരിക്കുന്ന സ്ഥിതിവിവരക്കണക്കുകള്‍ ആരോഗ്യ മന്ത്രാലയം പ്രസിദ്ധീകരിച്ചതല്ലെന്നും വ്യാജ വസ്തുതകളാണ് പ്രചരിക്കപ്പെടുന്നതെന്നും അദ്ദേഹം പറഞ്ഞു. ലോകത്തു തന്നെ ഏറ്റവും കുറഞ്ഞ എച്ച്‌ഐവി വ്യാപന നിരക്കുള്ള രാജ്യമാണ് സഊദി അറേബ്യ.

അറബ് മേഖലയിലും പ്രത്യേകിച്ച് സഊദിയിലും എയ്ഡ്‌സ് കേസുകള്‍ കൂടുന്നതായി ഒരു ഡോക്ടര്‍ അവകാശപ്പെടുന്ന വിഡിയോ കഴിഞ്ഞ ദിവസങ്ങളില്‍ വ്യാപകമായി സഊദിയില്‍ പ്രചരിച്ചിരുന്നു. ഇതിന് മറുപടിയായാണ് ആരോഗ്യ മന്ത്രാലയം വസ്തുതകളും സ്ഥിതിവിവര കണക്കുകളും വ്യക്തമാക്കി രംഗത്തുവന്നത്. അതേസമയം, ആരോഗ്യ മന്ത്രാലയത്തിന്റെ വെബ്‌സൈറ്റില്‍ എയ്ഡ്‌സിനെക്കുറിച്ച് പ്രസിദ്ധീകരിച്ച വിവരങ്ങള്‍ അനുസരിച്ച് സഊദിയില്‍ എച്ച്‌ഐവി ബാധിതരില്‍ തൊണ്ണൂറ് ശതമാനം പേരും പുരുഷന്മാരാണ്. എച്ച്‌ഐവി ബാധിതരായ ബാക്കി പത്തു ശതമാനം പേരേ സ്ത്രീകളായുള്ളൂ.

The Saudi Health Ministry has confirmed that reports of AIDS spreading in Saudi Arabia are fake news