ബാംഗ്ലൂർ: വുമൺസ് പ്രീമിയർ ലീഗിൽ തകർപ്പൻ നേട്ടവുമായി യുപി വാരിയേഴ്സിന്റെ വെസ്റ്റ്‌ ഇൻഡീസ് താരം ചിനല്ലേ ഹെൻറി. ഡൽഹി ക്യാപിറ്റൽസിനെതിരെയുള്ള മത്സരത്തിലാണ് താരം തകർപ്പൻ ബാറ്റിംഗ് പ്രകടനത്തിലൂടെ റെക്കോർഡ് സൃഷ്ടിച്ചത്. മത്സരത്തിൽ 23 പന്തിൽ 62 റൺസ് നേടി കൊണ്ടായിരുന്നു വെസ്റ്റ് ഇൻഡീസ് താരത്തിന്റെ വെടിക്കെട്ട് ഇന്നിങ്‌സ്. 269.57 സ്ട്രൈക്ക് റേറ്റിൽ എട്ട് കൂറ്റൻ സിക്സുകളും രണ്ട് ഫോറുകളും ആണ് താരം നേടിയത്. അവസാന ഓവറുകളിൽ ഇറങ്ങി തകർത്തടിക്കുകയായിരുന്നു ഹെൻറി.  

ടൂർണമെന്റിന്റെ ചരിത്രത്തിലെ ഏറ്റവും വേഗതയേറിയ അർദ്ധ സെഞ്ച്വറി ആണ് ഹെൻറി ഡൽഹിക്കെതിരെ നേടിയത്. വെറും 18 പന്തിൽ നിന്നായിരുന്നു ഹെൻറി ഫിഫ്റ്റി പൂർത്തിയാക്കിയത്. ഇതോടെ ഇത്ര തന്നെ പന്തിൽ നിന്നും അർദ്ധ സെഞ്ച്വറി പൂർത്തിയാക്കിയ മുംബൈ താരം സോഫിയ ഡുക്ലിയുടെ റെക്കോർഡിനൊപ്പം എത്താനും ഹെൻറിക്ക്‌ സാധിച്ചു. 2023ൽ റോയൽ ചലഞ്ചേഴ്സ് ബാംഗ്ലൂരിനെതിരെയാണ് സോഫിയ ഈ നേട്ടം സ്വന്തമാക്കിയിരുന്നത്. 

ഹെൻറിയുടെ അർദ്ധ സെഞ്ച്വറിയുടെ കരുത്തിൽ യുപി വാരിയേഴ്സ് 9 വിക്കറ്റ് നഷ്ടത്തിൽ 177 റൺസ് ആണ് അടിച്ചെടുത്തത്. ഹെൻറിക്ക് പുറമേ താഹില മഗ്രാത്ത് 23 പന്തിൽ 24 റൺസും കിരൺ നവ്ഗിരെ 20 പന്തിൽ 17 റൺസും നേടി നിർണായകമായി. ഡൽഹി ക്യാപ്പിറ്റൽസിന്റെ ബൗളിങ്ങിൽ ജെസ് ജൊനാസൻ നാലു വിക്കറ്റുകൾ നേടി മിന്നും പ്രകടനമാണ് നടത്തിയത്. മാരിസാനെ കാപ്പ്, അരുന്ധതി റെഡ്ഡി  എന്നിവർ രണ്ടു വിക്കറ്റ് വീതവും ശിഖ പാണ്ഡെ ഒരു വിക്കറ്റും നേടി.