റിയാദ്: സഊദി അറേബ്യയിലെ ഇമാമുമാരെയും രാജാക്കന്മാരെയും ആദരിച്ചുകൊണ്ട് തലസ്‌ഥാനത്തെ 15 പ്രധാന സ്ക്വയറുകളിൽ റോഡ് അടയാളങ്ങളും നെയിംപ്ലേറ്റുകളും സ്ഥാപിക്കാൻ ആരംഭിച്ച് റിയാദ് മുനിസിപ്പാലിറ്റി. സഊദി കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ്റെ നിർദേശപ്രകാരമാണ് ഈ തീരുമാനം.

കഴിഞ്ഞ മൂന്ന് നൂറ്റാണ്ടുകളായുള്ള സഊദി അറേബ്യയുടെ അടിത്തറ, ഏകീകരണം, വികസനം എന്നി ഘടകങ്ങളിൽ നിർണായക പങ്ക് വഹിച്ച വ്യക്തികളെ ആദരിക്കുന്നതിനും, ദേശീയ പൈതൃകം സംരക്ഷിക്കുന്നതിനുമുള്ള നേതൃത്വത്തിൻ്റെ പ്രതിബദ്ധത ഊന്നിപ്പറഞ്ഞുകൊണ്ടാണ് രാജ്യത്തിന്റെ സ്ഥാപക ദിനാഘോഷങ്ങളുടെ ഭാ​ഗമായി ഫെബ്രുവരി 22 ന് ഇവ സ്ഥാപിച്ചത്.

റിയാദ് മുനിസിപ്പാലിറ്റിയിൽ നിന്നുള്ള ഫീൽഡ് ടീമുകൾ എത്രയും വേ​ഗം സൈൻ ബോഡുകൾ സ്‌ഥാപിക്കാനും പുതിയ പേരുകൾ പ്രതിഫലിപ്പിക്കുന്നതിനായി ദിശാസൂചന മാർക്കറുകൾ അപ്ഡേറ്റ് ചെയ്യാനും ആരംഭിച്ചു. സഊദി അറേബ്യയുടെ ചരിത്രവും സാംസ്കാരിക മൂല്യങ്ങളും ഉയർത്തിക്കാണിക്കുന്ന വിഷൻ 2030 ന്റെ ലക്ഷ്യങ്ങളിലേക്ക് സംഭാവന നൽകാനും പൊതു ഇടങ്ങളിൽ ദേശീയ വ്യക്‌തിത്വം വർധിപ്പിക്കാനും ലക്ഷ്യമിട്ടുള്ള റിയാദ് മുനിസിപ്പാലിറ്റിയുടെ പദ്ധതിയുടെ ഭാഗമാണ് ഈ നീക്കം.

ഇമാം മുഹമ്മദ് ബിൻ സഊദ്, ഇമാം സഊദ് ബിൻ അബ്‌ദുൽ അസീസ്, ഇമാം അബ്‌ദുൽ അസീസ് ബിൻ മുഹമ്മദ്, ഇമാം അബ്‌ദുല്ല ബിൻ സൗഊദ്, ഇമാം ഫൈസൽ ബിൻ അബ്ദുല്ല, ഇമാം തുർക്കി ബിൻ അബ്‌ദുല്ല, ഇമാം ഫൈസൽ ബിൻ അബ്‌ദുല്ല എന്നിവരുൾപ്പെടെയുള്ള പ്രമുഖ നേതാക്കളുടെ പേരുകൾ പ്രധാന റോഡുകളിൽ സ്‌ഥിതി ചെയ്യുന്ന നിയുക്‌ത സ്ക്വയറുകളിൽ ഉണ്ടാകും.

ഇതിന് പുറമേ, ആധുനിക രാഷ്ട്രത്തിന് രൂപം നൽകിയ സഊദി രാജാക്കൻമാരായ അബ്‌ദുൽ അസീസ് രാജാവ്, ഖാലിദ് രാജാവ്, ഫഹദ് രാജാവ്, സഊദ് രാജാവ്, ഫൈസൽ രാജാവ്, അബ്ദുള്ള രാജാവ്, സൽമാൻ രാജാവ് തുടങ്ങിയവരുടെ പേരുകളും ഇവിടെ കാണാം.

Riyadh Municipality launches initiative to install road signs and nameplates honoring Imams and Kings in 15 major squares, promoting cultural heritage and national pride.