ഷാര്‍ജ: റിയല്‍ എസ്റ്റേറ്റ് സേവനങ്ങള്‍ക്കായുള്ള എമിറേറ്റിന്റെ സംയോജിത ഡിജിറ്റല്‍ പ്ലാറ്റ്‌ഫോമായ 'അഖാരി' ആരംഭിച്ച് ഷാര്‍ജ ഡിജിറ്റല്‍ ഡിപ്പാര്‍ട്ട്‌മെന്റ്.  

റിയല്‍ എസ്റ്റേറ്റ് നടപടിക്രമങ്ങള്‍ ഡിജിറ്റലൈസ് ചെയ്യുന്നതിനും കാര്യക്ഷമമാക്കുന്നതിനുമായി 20ലധികം പ്രാദേശിക, ഫെഡറല്‍ സര്‍ക്കാര്‍ സ്ഥാപനങ്ങളെ ഈ പ്ലാറ്റ്‌ഫോമിലൂടെ ഏകീകരിക്കും. ഇത് ഭരണരംഗത്ത് പുത്തന്‍ സാങ്കേതിവിദ്യകള്‍ ഉപയോഗിക്കുന്ന ഷാര്‍ജയുടെ പ്രതിബദ്ധത ശക്തിപ്പെടുത്തുകയും ഡിജിറ്റല്‍ പരിവര്‍ത്തനം ത്വരിതപ്പെടുത്തുകയും ചെയ്യും.

ഷാര്‍ജ കിരീടാവകാശിയും ഡെപ്യൂട്ടി ഭരണാധികാരിയുമായ ഷെയ്ഖ് സുല്‍ത്താന്‍ ബിന്‍ മുഹമ്മദ് ബിന്‍ സുല്‍ത്താന്‍ അല്‍ ഖാസിമി, അഖാരിയുടെ ഔദ്യോഗിക ലോഞ്ചില്‍ പങ്കെടുത്തു. ചടങ്ങില്‍ പ്രോജക്ട് ടീമിന്റെ ശ്രമങ്ങള്‍, പ്ലാറ്റ്‌ഫോമിന്റെ സേവനങ്ങള്‍, ഘട്ടം ഘട്ടമായുള്ള ഉപയോക്തൃ സേവനം എന്നിവ പ്രദര്‍ശിപ്പിച്ചു.

സേവന കേന്ദ്രങ്ങള്‍ സന്ദര്‍ശിക്കാതെ തന്നെ ഉപയോക്താക്കള്‍ക്ക് ഡിജിറ്റല്‍ സര്‍ട്ടിഫിക്കറ്റുകളും രേഖകളും എങ്ങനെ തടസ്സമില്ലാതെ നേടാമെന്ന് വീഡിയോയില്‍ പ്രദര്‍ശിപ്പിച്ചു. ഡിജിറ്റല്‍ പരിവര്‍ത്തനത്തിലൂടെ കാര്യക്ഷമതയും ഉപയോക്തൃ അനുഭവവും വര്‍ധിപ്പിക്കുന്നതിനുള്ള ഷാര്‍ജയുടെ പ്രതിബദ്ധത അടിവരയിടുന്നു.

വാടക കരാര്‍ ഡിജിറ്റലൈസ് സേവനത്തിന്റെ തത്സമയ പ്രദര്‍ശനത്തിലൂടെ ഷെയ്ഖ് സുല്‍ത്താനെ അപേക്ഷാ പ്രക്രിയയിലേക്ക് പരിചയപ്പെടുത്തി. 

വാടകകരാര്‍ ഡിജിറ്റലൈസ് ചെയ്യാന്‍ മുമ്പ് ഏഴ് ഘട്ടങ്ങളുണ്ടായിരുന്നു. കൂടാതെ ഒരു സേവന കേന്ദ്രം നേരിട്ട് സന്ദര്‍ശിക്കുകയും ചെയ്യണമായിരുന്നു. എന്നാല്‍ ഇപ്പോള്‍ ഈ പ്രക്രിയ മൂന്ന് ഘട്ടങ്ങളാക്കി ചുരുക്കിയിട്ടുണ്ട്.

പ്ലാറ്റ്‌ഫോമില്‍ ലോഗിന്‍ ചെയ്യുക ശേഷം ഒരു പ്രോപ്പര്‍ട്ടി തിരഞ്ഞെടുക്കുക. കരാര്‍ വിശദാംശങ്ങള്‍ പൂരിപ്പിക്കുക.
തുടര്‍ന്ന് ഫീസ് അടയ്ച്ചാല്‍ പൂര്‍ണ്ണമായും ഓട്ടോമേറ്റഡ് പ്രക്രിയയിലൂടെ കരാറിന്റെ ഡിജിറ്റല്‍ ഡോക്യുമെന്റ് ലഭിക്കും. 

വിവിധ സര്‍ക്കാര്‍, സ്വകാര്യ മേഖല സ്ഥാപനങ്ങളില്‍ നിന്നുള്ള 200ലധികം വിദഗ്ധരുടെ സഹകരണത്തോടെയാണ് അഖാരി പ്ലാറ്റ്‌ഫോം രൂപപ്പെടുത്തിയിരിക്കുന്നത്. ലക്ഷ്യമിട്ട കമ്പനികളില്‍ 25 ശതമാനവും 20 ദിവസത്തിനുള്ളില്‍ പദ്ധതിയില്‍ രജിസ്റ്റര്‍ ചെയ്തിട്ടുണ്ട്.

Sharjah's new Aqari platform simplifies the rental process to just three steps, removing the need for visits to service centers.