ലഖ്നോ: ഉത്തർപ്രദേശിൽ 2021 ന് ശേഷം ആരംഭിച്ച ഏഴ് വിമാനത്താവളങ്ങളിൽ ആറെണ്ണം പൂർണമായി അടച്ചുപൂട്ടലിലേക്ക്. ഇതിനകം ആറ് വിമാനത്താവളങ്ങളുടെ ഷെഡ്യൂൾ ചെയ്ത വാണിജ്യ വിമാന സർവീസുകൾ നിർത്തിവെച്ചു. എയർപോർട്ട് അതോറിറ്റി ഓഫ് ഇന്ത്യയിൽ നിന്ന് ലഭിച്ച വിവരങ്ങളുടെ അടിസ്ഥാനത്തിൽ ഇന്ത്യ ടുഡേ ആണ് യോഗി ആദിത്യനാഥ്‌ സർക്കാർ കൊട്ടിഘോഷിച്ച് ഉദ്‌ഘാടനം ചെയ്ത വിമാനത്താവങ്ങളുടെ ഇപ്പോഴത്തെ അവസ്ഥ പുറത്തുവിട്ടത്.

2021 ഒക്ടോബർ 20 ന് ഉദ്ഘാടനം നടത്തിയ കുശിനഗർ വിമാനത്താവളത്തിൽ ഷെഡ്യൂൾ ചെയ്ത വിമാനങ്ങൾ 2021 നവംബർ 26 ന് ആരംഭിച്ചു. എന്നാൽ പ്രവർത്തനം ആരംഭിച്ച് രണ്ട് വർഷത്തിന് ശേഷം 2023 നവംബറിൽ പ്രവർത്തനങ്ങൾ നിർത്തിവച്ചു. 2022 മാർച്ചിൽ ഒരു മാസത്തിനുള്ളിൽ 54 ഷെഡ്യൂൾ ചെയ്ത വിമാന സർവീസുകളുമായി വിമാനത്താവളം അതിന്റെ ഏറ്റവും ഉയർന്ന നിലയിലെത്തിയിരുന്നെങ്കിലും പിന്നീട് തകർച്ചയായിരുന്നു ഫലം.

ALSO READ: പാരിതോഷികം കിട്ടാൻ റെയിൽവേ ട്രാക്കിൽ സ്ഫോടകവസ്തുക്കൾ വെച്ചു; വഡോദരയിൽ റെയിൽവേ കരാറുകാരൻ പിടിയിൽ

2024 മാർച്ചിൽ ഉദ്ഘാടനം ചെയ്യപ്പെട്ട അസംഗഡ്, അലിഗഡ്, ചിത്രകൂട്, ശ്രാവസ്തി, മൊറാദാബാദ് വിമാനത്താവളങ്ങളിലെ സർവീസുകൾ മാസങ്ങൾക്കുള്ളിൽ നിർത്തിവച്ചു. അസംഗഡും ചിത്രകൂടും ഏകദേശം എട്ട് മുതൽ ഒമ്പത് മാസം വരെയും മൊറാദാബാദ് ഏകദേശം മൂന്ന് മാസം വരെയും പ്രവർത്തിച്ചു. അതേസമയം ശ്രാവസ്തി, അലിഗഡ് എന്നിവയും ആരംഭിച്ചതിന് തൊട്ടുപിന്നാലെ നിർത്തിവച്ചു.

ALSO READ: 'ജിഹാദ്' പ്രയോഗത്തിന് നിയന്ത്രണം; വാർത്താ ചാനലുകൾക്ക് പുതിയ മാർഗരേഖയുമായി എൻ.ബി.ഡി.എസ്.എ; സീ ന്യൂസ്, ന്യൂസ് 18 ഉൾപ്പെടെയുള്ള ചാനലുകൾക്ക് താക്കീത്

2023 ഡിസംബർ 30-ന് ഉദ്ഘാടനം ചെയ്യപ്പെട്ട അയോധ്യ വിമാനത്താവളം മാത്രമാണ് 2021 ന് ശേഷം പ്രവർത്തനമാരംഭിച്ചവയിൽ പ്രവർത്തനക്ഷമമായി ഉള്ളത്. 2024 ജനുവരി 10-ന് വിമാന സർവിസുകൾ ആരംഭിച്ച വിമാനത്താവളത്തിൽ ഇപ്പോഴും സർവീസുകൾ തുടരുന്നെന്ന് എയർപോർട്ട് അതോറിറ്റി ഓഫ് ഇന്ത്യയുടെ കണക്കിൽ പറയുന്നു.

ALSO READ: ഒരിടത്ത് ആക്രമണം, മറ്റൊരിടത്ത് സംഭാവന; ബീഫ് കയറ്റുമതിക്കാരിൽ ബി.ജെ.പിക്ക് ലഭിച്ചത് കോടികളുടെ സംഭാവന

കോടികൾ ചെലവഴിച്ച് ഉത്തർപ്രദേശിലെ ബിജെപി സർക്കാർ നിർമിച്ച എയർപോർട്ടുകളാണ് നിലവിൽ ആളും ആരവവുമില്ലാതെ വെറുതെ കിടക്കുന്നത്. ഭരണ നേട്ടമായി മുഖ്യമന്ത്രി യോഗി ആദിത്യനാഥ്‌ ചൂണ്ടിക്കാണിക്കുന്ന കുശിനഗർ, അലിഗഢ്, ചിത്രകൂട്, ശ്രാവസ്തി, മൊറാദാബാദ്, അസംഗഢ് എന്നിവിടങ്ങളിലെ വിമാനത്താവളങ്ങളാണ് വൈകാതെ പൂർണമായ അടച്ചുപൂട്ടലിലേക്ക് നീങ്ങുന്നത്. ഈ കെടുകാര്യസ്ഥത സംസ്ഥാനത്തിന്റെ ദീർഘവീക്ഷണത്തിന്റെയും പഠനങ്ങളെയുമാണ് ചോദ്യമുനയിൽ നിർത്തുന്നത്.