ലഖ്‌നൗ: ഹോളി ആഘോഷങ്ങള്‍ക്ക് മുന്നോടിയായി യുപിയിലെ ഷാജഹാന്‍പൂരില്‍ പള്ളികള്‍ ഇത്തവണയും ടാര്‍പോളിന്‍ കൊണ്ട് മൂടുന്നു. ഹോളി ആഘോഷങ്ങളുടെ ഭാഗമായി സമാധാനം പുലര്‍ത്തുന്നതിനും പള്ളികളുടെ സുരക്ഷാ ഉറപ്പാക്കുന്നതിനുമാണ് നടപടിയെന്നാണ് ഷാജഹാന്‍പൂര്‍ ജില്ലാ ഭരണകൂടം നല്‍കുന്ന വിശദീകരണം. 

ഹോളി ആഘോഷങ്ങളുടെ ഭാഗമായി ഭാഗമായി ഷാജഹാന്‍പൂര്‍ ജില്ലയില്‍ 'ജൂട്ടാ മാര്‍ ഹോളി' എന്ന പേരില്‍ ആയിരക്കണക്കിന് ആളുകള്‍ പങ്കെടുക്കുന്ന ഘോഷയാത്ര നടത്താറുണ്ട്. പ്രദേശത്തെ ഏറ്റവും വ്യത്യസ്തമായ ഹോളി പാരമ്പര്യങ്ങളിലൊന്നാണ് ഇത്. ഏകദേശം 10 കിലോമീറ്റര്‍ നീളുന്ന ഘോഷയാത്രയില്‍ ആളുകള്‍ ചെരുപ്പുകള്‍ ഉപയോഗിച്ചുള്ള 'ജൂട്ടാ മാര്‍ ഹോളി' കളിയില്‍ ഏര്‍പ്പെടും. ബ്രിട്ടീഷ് കാലഘട്ടത്തിലെ 'ലാത്ത് സാഹബ്' ആയി വേഷം ധരിച്ച് ഒരാള്‍ എരുമ വണ്ടിയില്‍ സഞ്ചരിക്കുന്നു. നിറങ്ങള്‍ കൊണ്ട് കളിക്കുന്നതിനിടെ ഇയാള്‍ക്ക്  നേരെ ആളുകള്‍ ഷൂസ് എറിയുകയും  ചെയ്യുന്നു. ഇതാണ് ആഘോഷം. 

ALSO READ: 'ജിഹാദ്' പ്രയോഗത്തിന് നിയന്ത്രണം; വാർത്താ ചാനലുകൾക്ക് പുതിയ മാർഗരേഖയുമായി എൻ.ബി.ഡി.എസ്.എ; സീ ന്യൂസ്, ന്യൂസ് 18 ഉൾപ്പെടെയുള്ള ചാനലുകൾക്ക് താക്കീത്

ഇത്തരം ആഘോഷങ്ങള്‍ക്കിടയില്‍ അനിഷ്ട സംഭവങ്ങള്‍ ഉണ്ടാകാതിരിക്കാനാണ് ഘോഷയാത്ര കടന്നുപോകുന്ന വഴിയിലെ പള്ളികള്‍ ടാര്‍പോളിന്‍ ഉപയോഗിച്ച് മൂടികെട്ടിയത്. പള്ളികളില്‍ നിറങ്ങള്‍ പുരളുന്നത് തടയാനും ഇതുവഴി സാധിക്കും. പള്ളികള്‍ക്ക് കേടുപാടുകള്‍ സംഭവിക്കുന്നത് തടയുന്നതിനും ആഘോഷങ്ങളുടെ സുഗമമായ നടത്തിപ്പിനുമാണ് മുന്‍കരുതല്‍ നടപടികളെന്ന് പ്രാദേശിക നേതൃത്വം അറിയിച്ചു.

200-ലധികം മജിസ്ട്രേറ്റുമാരുടെ വിന്യസിക്കുന്നതോടൊപ്പം, ഈ വര്‍ഷത്തെ ഘോഷയാത്രയില്‍ കഴിഞ്ഞ വര്‍ഷത്തേക്കാള്‍ ഒന്നര മടങ്ങ് കൂടുതല്‍ സുരക്ഷാ ഉദ്യോഗസ്ഥരും ഉണ്ടാകുമെന്ന് ഷാജഹാന്‍പൂര്‍ പൊലിസ് സൂപ്രണ്ട് രാജേഷ് ദ്വിവേദി അറിയിച്ചു. ഘോഷയാത്ര പോകുന്ന വഴിയിലുള്ള  48 പള്ളികളും മഖ്ബറകളും പൂര്‍ണ്ണമായും കട്ടിയുള്ള പ്ലാസ്റ്റിക് ഷീറ്റുകള്‍ കൊണ്ട് മൂടിയതായി അഡീഷണല്‍ ജില്ലാ മജിസ്ട്രേറ്റ് (അഡ്മിനിസ്‌ട്രേഷന്‍) രജനീഷ് കുമാര്‍ മിശ്ര പറഞ്ഞു. തിരക്ക് ഒഴിവാക്കാന്‍ ഘോഷയാത്ര റൂട്ടിലേക്ക് തുറക്കുന്ന 148 വരികളില്‍ ബാരിക്കേഡുകള്‍ സ്ഥാപിക്കുമെന്നും അദ്ദേഹം വ്യക്തമാക്കി. 

കഴിഞ്ഞ വര്‍ഷവും സമാന രീതിയിലുള്ള നടപടി ജില്ലാഭരണകൂടം സ്വീകരിച്ചിരുന്നു.  

ahead of holi celebrations, mosques in shahjahanpur uttar pradesh have been covered with tarpaulin sheets to ensure peace and prevent damage during the traditional joota maar holi procession. authorities have deployed heavy security and installed barricades along the route.