ഈരാറ്റുപേട്ട: മതവിദ്വേഷ പരാമര്‍ശ കേസില്‍ ബിജെപി നേതാവ് പി.സി.ജോര്‍ജിന് ജാമ്യം. ഈരാറ്റുപേട്ട മജിസ്‌ട്രേറ്റ് കോടതിയാണ് ജാമ്യം അനുവദിച്ചിരിക്കുന്നത്. പ്രോസിക്യൂഷന്‍ ജാമ്യത്തെ എതിര്‍ത്തെങ്കിലും കോടതി ജാമ്യം അനുവദിക്കുകയായിരുന്നു.

ജാമ്യാപേക്ഷയില്‍ ഇന്നലെ വാദം പൂര്‍ത്തിയായതിനെ തുടര്‍ന്ന് വിധി പറയാനായി മജിസ്‌ട്രേറ്റ് ആര്‍. കൃഷ്ണപ്രഭന്‍ ഹരജി ഇന്നത്തേക്ക് മാറ്റുകയായിരുന്നു. ശക്തമായ വാദപ്രതിവാദങ്ങളാണ് ഇന്നലെ കോടതിയില്‍ നടന്നത്. ആരോഗ്യ പ്രശ്‌നങ്ങളും പ്രായവും ചൂണ്ടിക്കാട്ടി ജോര്‍ജിന്റെ അഭിഭാഷകന്‍ വാദം ഉയര്‍ത്തിയപ്പോള്‍ ജാമ്യം നല്‍കുന്നതിനെ പ്രോസിക്യൂഷന്‍ ശക്തമായി എതിര്‍ത്തു. ആരോഗ്യസ്ഥിതി മോശമാണെന്നും ആന്‍ജിയോഗ്രാം ഉള്‍പ്പെടെ ചെയ്യേണ്ടതുണ്ടെന്നും മികച്ച ചികിത്സ ലഭിക്കാന്‍ ജാമ്യം നല്‍കണമെന്നും ജോര്‍ജിന്റെ അഭിഭാഷകന്‍ വാദിച്ചു.

പൊതുപ്രവര്‍ത്തകന്‍ ആയാല്‍ കേസ് ഉണ്ടാകും. രാജ്യത്തെ പല പൊതുപ്രവര്‍ത്തകര്‍ക്കുമുള്ള തരം കേസുകളേ ജോര്‍ജിനും ഉള്ളൂ. കേസില്‍ അന്വേഷണം പൂര്‍ത്തിയായി എന്ന് പൊലിസ് തന്നെ പറഞ്ഞതിനാല്‍ ജാമ്യം നല്‍കണമെന്നും അഭിഭാഷകന്‍ പറഞ്ഞു. ഇതിനെ ശക്തമായി എതിര്‍ത്ത പ്രോസിക്യൂഷന്‍ ജാമ്യം തെറ്റായ സന്ദേശം നല്‍കുമെന്ന് വാദിച്ചു. 

ജോര്‍ജ് ജാമ്യവ്യസ്ഥ സ്ഥിരമായി ലംഘിക്കുന്ന ആളാണെന്ന് വ്യക്തമാക്കാന്‍ അദ്ദേഹത്തിന്റെ മുന്‍ കേസുകളും പ്രോസിക്യൂഷന്‍ കോടതിയില്‍ വിവരിച്ചു. ഭരണഘടനയുടെ ആമുഖത്തെ തന്നെ നിഷേധിക്കുന്നതും സാഹൂഹികസ്പര്‍ധ ഉണ്ടാക്കുന്ന തരത്തിലുമുള്ള പരാമര്‍ശമാണ് പ്രതി നടത്തിയത്. 30 വര്‍ഷം എം.എല്‍.എ ആയിരുന്ന ആളില്‍ നിന്നാണ് ഇങ്ങനെ ഉണ്ടായിരിക്കുന്നതെന്നും പ്രോസിക്യൂഷന്‍ കോടതിയെ അറിയിച്ചു. 

മുന്‍കൂര്‍ ജാമ്യത്തിന് പോയപ്പോള്‍ തന്നെ ഹൈക്കോടതിയില്‍ ഇത് ബോധ്യപ്പെടുത്തിയതാണ്. ഇതെല്ലാം പരിഗണിച്ചാണ് ഹൈക്കോടതി മുന്‍കൂര്‍ ജാമ്യം നിഷേധിച്ചതെന്നും പ്രോസിക്യൂഷന്‍ വാദിച്ചു. പ്രതിയുടെ ആളുകള്‍ പരാതിക്കാരെ ഭീഷണിപ്പെടുത്തിയെന്നും പ്രോസിക്യൂഷന്‍ കോടതിയെ അറിയിച്ചു. നിലവില്‍ കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയിലാണ് പി.സി ജോര്‍ജ്.