തിരുവനന്തപുരം: ശസ്ത്രക്രിയയ്ക്കിടെ ഗുരുതര വീഴ്ച വരുത്തിയ സ്വകാര്യ ആശുപത്രിക്കെതിരെ കഴക്കൂട്ടം പൊലിസ് കേസെടുത്തു. ശസ്ത്രക്രിയയ്ക്ക് ശേഷം വയറിനുള്ളില്‍ തുണിക്കഷ്ണം വച്ച് തുന്നിക്കെട്ടിയതിനെത്തുടര്‍ന്ന് മാസങ്ങളോളം ദുരിതമനുഭവിച്ച മേനംകുളം സ്വദേശിനി ഷീബ പ്രമോദിന്റെ പരാതിയിലാണ് നടപടി. കഴക്കൂട്ടം സി.എസ്.ഐ മിഷന്‍ ആശുപത്രിക്കെതിരെയാണ് കേസ് രജിസ്റ്റര്‍ ചെയ്തിരിക്കുന്നത്.

കഴിഞ്ഞ ഡിസംബര്‍ 3നാണ് ഷീബ വയറുവേദനയെത്തുടര്‍ന്ന് ആശുപത്രിയില്‍ ചികിത്സ തേടിയെത്തുന്നത്. പരിശോധനയില്‍ അപ്പന്‍ഡിസൈറ്റിസ് പഴുത്തു പൊട്ടിയതാണെന്ന് കണ്ടെത്തുകയും ഉടന്‍ ശസ്ത്രക്രിയ നടത്തുകയും ചെയ്തു. ഡിസംബര്‍ 12ന് ഡിസ്ചാര്‍ജ് ചെയ്‌തെങ്കിലും ശസ്ത്രക്രിയ നടത്തിയ മുറിവിന്റെ ഒരു ഭാഗം ഉണങ്ങാതെ പഴുക്കുകയും കഠിനമായ വേദന അനുഭവപ്പെടുകയും ചെയ്തു.

ALSO READ: റേഷന്‍ കാര്‍ഡ് വിതരണം: ഒരാഴ്ചയ്ക്കകം 65,000 മുന്‍ഗണനാ കാര്‍ഡുകള്‍ കൂടി നല്‍കും; അഞ്ചുവര്‍ഷത്തിനിടെ ലഭിച്ചത് 7 ലക്ഷം കുടുംബങ്ങള്‍ക്ക്

മൂന്ന് മാസത്തോളം വേദന സഹിച്ച ഷീബ ഒടുവില്‍ മറ്റൊരു സ്വകാര്യ ആശുപത്രിയില്‍ ചികിത്സ തേടുകയായിരുന്നു. അവിടെ നടത്തിയ പരിശോധനയില്‍ മുറിവിലൂടെ നൂല്‍ പുറത്തേക്ക് വരുന്നത് ശ്രദ്ധയില്‍പ്പെട്ടു. തുടര്‍ന്ന് നടത്തിയ വിശദമായ പരിശോധനയിലാണ് വയറിനുള്ളില്‍ പഞ്ഞിയും തുണിക്കഷ്ണവും ഉണ്ടെന്ന് കണ്ടെത്തിയത്. ആശുപത്രി അധികൃതരുടെ അനാസ്ഥയ്‌ക്കെതിരെ ശക്തമായ നടപടി വേണമെന്നാണ് കുടുംബത്തിന്റെ ആവശ്യം.

Kazhakoottam police registered a case against CSI Mission Hospital after a woman suffered for three months due to a cloth fragment left inside her abdomen during surgery.