നാഗ്പൂർ: രഞ്ജി ട്രോഫി ഫൈനലിന്റെ മൂന്നാം ദിവസം കേരളം 342 റൺസിന് പുറത്തായി. ഇതോടെ 37 റൺസിന്റെ ലീഡ് വിദർഭ സ്വന്തമാക്കിയിരിക്കുകയാണ്. വിദർയുടെ ബൗളിങ്ങിൽ രേഖാഡെ, ഹർഷ് ദുബെ, ദാർശൻ നാൽക്കണ്ടെ എന്നിവർ മൂന്ന് വീതം വിക്കറ്റുകൾ നേടി തിളങ്ങിയപ്പോൾ കേരളം അവസാന നിമിഷങ്ങളിൽ ഓൾ ഔട്ടാവുകയായിരുന്നു.

മത്സരത്തിൽ നേടിയ ഈ മൂന്ന് വിക്കറ്റുകൾക്ക് പിന്നാലെ രഞ്ജി ട്രോഫിയിൽ ഒരു എഡിഷനിൽ ഏറ്റവും കൂടുതൽ വിക്കറ്റുകൾ സ്വന്തമാക്കുന്ന താരമായി മാറാൻ ഹർഷ് ദുബെക്ക് സാധിച്ചു. 69 വിക്കറ്റുകളാണ്‌ താരം ഈ സീസണിൽ നേടിയത്. ബീഹാറിനായി 2018-19 സീസണിൽ 68 വിക്കറ്റുകൾ നേടിയ അശുതോഷ് അമനാണ് ഇതിനു മുമ്പ് ഈ നേട്ടം സ്വന്തമാക്കിയിരുന്നത്. 

അതേസമയം മത്സരത്തിൽ കേരളത്തിനായി ക്യാപ്റ്റൻ സച്ചിൻ ബേബി 98 റൺസ് നേടി. 10 ഫോറുകൾ ആയിരുന്നു സച്ചിൻ നേടിയത്. ആദിത്യ സാർവതെ 185 പന്തിൽ 79 റൺസും അഹമ്മദ് ഇമ്രാൻ 83 പന്തിൽ 37 റൺസും മുഹമ്മദ് അസ്ഹുദീൻ 59 പന്തിൽ 34 റൺസും നേടി. 

ഒന്നാം ഇന്നിങ്സിൽ ബാറ്റ് ചെയ്ത വിദർഭ 379 റൺസിനാണ് പുറത്തായത്. ഡാനിഷ് മാലേവാറിന്റെ സെഞ്ച്വറി കരുത്തിലാണ് വിദർഭ മികച്ച സ്കോർ സ്വന്തമാക്കിയത്. 285 പന്തിൽ 153 റൺസാണ് താരം നേടിയത്. 15 ഫോറുകളും മൂന്ന് സിക്സുകളും അടങ്ങുന്നതായിരുന്നു മാലേവാറിന്റെ ഇന്നിങ്‌സ്. കരുൺ നായർ അർദ്ധ സെഞ്ച്വറിയും നേടി മികച്ച പ്രകടനം നടത്തി. എട്ട് ഫോറുകളും ഒരു സിക്‌സും അടക്കം 188 പന്തിൽ 86 റൺസാണ് കരുൺ നേടിയത്.