യുക്രൈൻ റഷ്യ യുദ്ധം അവസാനിക്കുമെന്ന് പ്രത്യാശ പ്രകടിപ്പിച്ച യുഎസ് പ്രസിഡന്റ് ഡൊണാൾഡ് ട്രംപ്, യുദ്ധമുന്നണിയിൽ പോരാടുന്ന ആയിരക്കണക്കിന് യുക്രൈൻ സൈനികരുടെ ജീവൻ രക്ഷിക്കണമെന്ന് റഷ്യൻ പ്രസിഡന്റ് വ്‌ളാഡിമിർ പുടിനോട് അഭ്യർത്ഥിച്ചു.

"റഷ്യൻ പ്രസിഡന്റ് വ്‌ളാഡിമിർ പുടിനുമായി ഞങ്ങൾ ഇന്നലെ വളരെ നല്ലതും ഫലപ്രദവുമായ ചർച്ചകൾ നടത്തി, ഈ ഭയാനകവും രക്തരൂക്ഷിതവുമായ യുദ്ധം അവസാനിക്കാൻ വളരെയധികം സാധ്യതയുണ്ട് - പക്ഷേ, ഈ നിമിഷം, ആയിരക്കണക്കിന് യുക്രൈൻ സൈനികർ പൂർണ്ണമായും റഷ്യൻ സൈന്യത്താൽ വളഞ്ഞിരിക്കുന്നു. അവരുടെ ജീവൻ രക്ഷിക്കണമെന്ന് ഞാൻ പ്രസിഡന്റ് പുടിനോട് ശക്തമായി അഭ്യർത്ഥിച്ചിട്ടുണ്ട്. രണ്ടാം ലോക മഹായുദ്ധത്തിനുശേഷം കണ്ടിട്ടില്ലാത്ത ഒരു ഭയാനകമായ കൂട്ടക്കൊലയായിരിക്കും ഇത്. ദൈവം അവരെയെല്ലാം അനുഗ്രഹിക്കട്ടെ" എന്നും  ട്രംപ് തന്റെ ട്രൂത്ത് സോഷ്യൽ പ്ലാറ്റ്‌ഫോമിൽ എഴുതി.

മോസ്കോയിൽ റഷ്യൻ ഉദ്യോഗസ്ഥരുമായി നടത്തിയ 'രഹസ്യ' കൂടിക്കാഴ്ചക്ക് ശേഷം ട്രംപിന്റെ പ്രത്യേക ദൂതൻ സ്റ്റീവ് വിറ്റ്കോഫ് പ്രസിഡന്റ് പുടിന്റെ സന്ദേശം വഹിച്ചിരുന്നുവെന്ന് പറഞ്ഞതിന് പിന്നാലെയാണ് യുഎസ് പ്രസിഡന്റിന്റെ പ്രസ്താവന. മൂന്ന് വർഷം നീണ്ട യുദ്ധം അവസാനിപ്പിക്കാനുള്ള യുഎസ് ശ്രമങ്ങളുടെ ഭാഗമായിരുന്നു അദ്ദേഹത്തിന്റെ സന്ദർശനം.

ഉപാധികളോടെ വെടിനിർത്തലിന് തയ്യാറാണെന്ന് ഇന്നലെ റഷ്യൻ പ്രസിഡണ്ട് വ്ലാദിമിർ പുടിൻ വ്യക്തമാക്കിയിരുന്നു. വെടിനിർത്തലിലൂടെ അടിസ്ഥാന പ്രശ്നങ്ങൾ പരിഹരിക്കപ്പെടണം, മാത്രമല്ല, അതിലൂടെ ശാശ്വത സമാധാനത്തിലേക്ക് എത്തണമെന്നും പുടിൻ നിലപാടെടുത്തു. 30 ദിവസത്തേക്ക് യുക്രൈനിൽ താൽക്കാലിക വെടിനിർത്തലിന് റഷ്യ സമ്മതിച്ചതായും വാർത്താ സമ്മേളനത്തിൽ പുടിൻ അറിയിച്ചിരുന്നു.

മുന്‍പ്, അമേരിക്ക മുന്നോട്ടുവച്ച ഉപാധിരഹിത വെടിനിർത്തൽ തള്ളിയ റഷ്യ, അത് യുക്രൈനിന് അനുകൂലമായ നിലപാടാണെന്നാണ് പ്രതികരിച്ചത്. എന്നാൽ, ഇപ്പോൾ ഇരുരാജ്യങ്ങളുടെയും ഭാവി കുറിക്കുന്ന ഒരു നിർണായക തീരുമാനമാണ് റഷ്യ സ്വീകരിച്ചിരിക്കുന്നത്. വെടിനിർത്തൽ അംഗീകരിക്കാമെന്നും, ഇതിന് തീർപ്പു വേണമെന്നും പുടിൻ ഇന്നലെ വാർത്താ സമ്മേളനത്തിൽ വ്യക്തമാക്കിയിരുന്നു.

ട്രംപിന്റെ പ്രതിനിധി റഷ്യയുമായി ചർച്ചകൾ നടത്തുന്നതിന് മോസ്കോയിൽ എത്തിയതിന് പിന്നാലെയായിരുന്നു പുടിൻ അനുകൂലമായ നിലപാട് എടുത്തത്. നേരത്തെ തന്നെ യുക്രൈൻ വെടിനിർത്തലിന് അനുകൂല നിലപാട് സ്വീകരിച്ചിരുന്നു. നേരത്തെ തന്നെ ട്രംപ് ഭരണകൂടം റഷ്യ-യുക്രൈൻ യുദ്ധത്തിൽ ഒത്തു തീർപ്പിനുള്ള ശ്രമം നടത്തിയിരുന്നു.

Donald Trump has reached out to Vladimir Putin, urging him to spare the lives of Ukrainian soldiers. This development comes after a productive conversation between the two leaders, with Trump hinting at a possible end to the ongoing conflict