കൊച്ചി: കളമശേരി ഗവ. പോളിടെക്‌നിക് കോളജില്‍ ലഹരിവസ്തുക്കളുണ്ടെന്ന വിവരം പൊലിസിനെ അറിയിച്ചത് പ്രിന്‍സിപ്പല്‍. ഇതോടെ പ്രത്യേക സംഘം മിന്നല്‍ പരിശോധന നടത്തുകയായിരുന്നു. 14ാം തിയതി കാംപസില്‍ ഹോളി ആഘോഷിക്കുന്നതിനിടെ വിലയ അളവില്‍ ലഹരി ഉപയോഗിക്കാന്‍ സാധ്യതയുണ്ടെന്ന് ചൂണ്ടിക്കാട്ടിയാണ് പ്രിന്‍സിപ്പല്‍ കത്തു നല്‍കിയത്. 12ാം തിയതി കൊച്ചി ഡെപ്യൂട്ടി പൊലിസ് കമ്മീഷണര്‍ക്ക് പ്രിന്‍സിപ്പല്‍ നല്‍കിയ കത്തിന്റെ അടിസ്ഥാനത്തിലാണ് വ്യാഴാഴ്ച രാത്രിതന്നെ പൊളിയിലെ ആണ്‍കുട്ടികളുടെ ഹോസ്റ്റലില്‍ പൊലിസ് സംഘം മിന്നല്‍ പരിശോധന നടത്തിയത്. 

പ്രിന്‍സപ്പലിന്റെ കത്തിന്‍ രൂപം

' ഈ സ്ഥാപനത്തില്‍ വിദ്യാര്‍ഥികള്‍ 14ാം തിയത്തി ഉച്ച മുതല്‍ ഹോളി ആഘോഷിക്കാന്‍ തീരുമാനിച്ചിട്ടുണ്ട്. മദ്യം, മയക്കുമരുന്ന്, മറ്റു ലഹരിപദാര്‍ഥങ്ങളുടെ അനിയന്ത്രിത ഉപയോഗം അന്നേ ദിവസം ഉണ്ടാകുമെന്ന് വിശ്വസനീയമായ ഉറവിടങ്ങളില്‍ നിന്ന് വിവരം ലഭിച്ചിട്ടുണ്ട്. വിദ്യാര്‍ഥികള്‍ ഈ ആവശ്യത്തിനായി പണപ്പിരിവ് നടത്തിയതായി മനസിലാക്കാന്‍ കഴിഞ്ഞിട്ടുണ്ട്. കാംപസിനുള്ളില്‍ ഈ അവസരത്തില്‍ പൊലിസിന്റെ സാന്നിധ്യം ഉണ്ടാവണം. നിരീക്ഷണം കൂടുതല്‍ ശക്തമാക്കണം. കാംപസിനകത്തും പുറത്തും ലഹരി ഉപയോഗത്തിനെതിരേ ശക്തമായ നടപടി ഉണ്ടാവണമെന്ന് അപേക്ഷിക്കുന്നു.' 

അതേ സമയം പോളിയിലെ ഹോസ്റ്റലില്‍ കഞ്ചാവ് എത്തിച്ച രണ്ടു പൂര്‍വ വിദ്യാര്‍ഥികളെ ഇന്നലെ രാത്രിയില്‍ കൊച്ചിയില്‍ നിന്നു തന്നെ പ്രത്യേക സംഘം പിടികൂടുകയും ചെയ്തിരുന്നു. പൂര്‍വ വിദ്യാര്‍ഥികളായ ആഷിക്, ഷാരില്‍ എന്നിവരെയാണ് പ്രത്യേക അന്വേഷണം സംഘം പിടികൂടിയത്.

വ്യാഴാഴ്ച രാത്രിയായിരുന്നു പോളിടെക്‌നിക് കോളജിലെ ആണ്‍കുട്ടികുടെ ഹോസ്റ്റലില്‍ കഞ്ചാവ് വേട്ട നടത്തിയത്. ഏഴുമണിക്കൂറോളം നീണ്ടു നിന്ന മിന്നല്‍ പരിശോധനയില്‍ പൊലിസ് രണ്ടു കിലോ കഞ്ചാവ് പിടികൂടി. ഹോളി ആഘോഷിക്കാനായി ഹോസ്റ്റലില്‍ കഞ്ചാവ് എത്തിച്ചിട്ടുണ്ടെന്ന രഹസ്യവിവരത്തെ തുടര്‍ന്നായിരുന്നു ഹോസ്റ്റലില്‍ പരിശോധന നടത്തിയത്.