ഐപിഎൽ മെഗാ ലേലത്തിൽ 18 കോടി രൂപയ്ക്കാണ് ഇന്ത്യൻ സ്പിന്നർ യുസ്വേന്ദ്ര ചഹലിനെ പഞ്ചാബ് കിങ്‌സ് സ്വന്തമാക്കിയത്. ഇപ്പോഴിതാ ലേലത്തിൽ തനിക്ക് ലഭിച്ച ഈ തുകയ്ക്ക് താൻ അർഹനാണെന്ന് പറഞ്ഞിരിക്കുകയാണ്ചഹൽ. ഹിന്ദുസ്ഥാൻ ടൈംസിന് നൽകിയ അഭിമുഖത്തിൽ സംസാരിക്കുകയായിരുന്നു ചഹൽ.

'ഐപിഎൽ ലേലത്തിന്റെ ആദ്യ നിമിഷങ്ങളിൽ എന്നെ ആരും വാങ്ങാത്തപ്പോൾ ഞാൻ വളരെ പരിഭ്രാന്തിയിൽ ആയിരുന്നു. ലേലം അങ്ങനെയാണ് ഏത് ടീം എത്ര വിലയ്ക്ക് താരങ്ങളെ വാങ്ങുമെന്ന് അറിയാൻ കഴിയില്ല. ഈ സമയങ്ങളിൽ മനസ്സിൽ ഒരുപാട് ചിന്തകൾ വരും. ലേലത്തിൽ എനിക്ക് ലഭിച്ച ഈ തുകയ്ക്ക് ഞാൻ അർഹനാണ്" ചഹൽ പറഞ്ഞു. 

രാജസ്ഥാൻ റോയൽസ് ഈ സീസണിൽ ചഹലിനെ നിലനിർത്താതെ പോവുകയായിരുന്നു. മൂന്ന് സീസണുകളിലായി രാജസ്ഥാനായി മികച്ച പ്രകടനം നടത്തിയിട്ടും ചഹലിനെ ടീം നിലനിർത്താതെ പോവുകയായിരുന്നു. ഐപിഎൽ ചരിത്രത്തിൽ ഏറ്റവും കൂടുതൽ വിക്കറ്റുകൾ നേടിയ താരം കൂടിയാണ് ചഹൽ. 160 മത്സരങ്ങളിൽ നിന്നും 205 വിക്കറ്റുകൾ ആണ് താരം നേടിയിട്ടുള്ളത്.  2022 ഐപിഎല്ലിലെ പർപ്പിൾ ക്യാപ്പ് സ്വന്തമാക്കിയതും ചഹൽ തന്നെയാണ്. എന്നാൽ കഴിഞ്ഞ രണ്ടു വർഷമായി ഇന്ത്യൻ ഏകദിന ടീമിൽ ഇടം നേടാൻ ചഹലിന് സാധിച്ചിട്ടില്ല. ഈ സീസണിൽ മികച്ച പ്രകടനം നടത്തിക്കൊണ്ട് ഇന്ത്യൻ ടീമിലേക്ക് മടങ്ങിയെത്താനുള്ള അവസരം കൂടിയാണ് ചഹലിന്റെ മുന്നിലുള്ളത്. 

ഇത്തവണ ശ്രേയസ് അയ്യറിന്റെ കീഴിലാണ് പഞ്ചാബ് ഐപിഎൽ പോരാട്ടത്തിനിറങ്ങുന്നത്. ഐപിഎൽ മെഗാ ലേലത്തിൽ 26.5 കോടിക്കായിരുന്നു ശ്രേയസിനെ പഞ്ചാബ് സ്വന്തമാക്കിയിരുന്നത്. ഐപിഎൽ ചരിത്രത്തിൽ ലേലത്തിൽ ഒരു താരത്തിന് ലഭിക്കുന്ന ഏറ്റവും ഉയർന്ന രണ്ടാമത്തെ തുക കൂടിയാണിത്. താരത്തിന്റെ ഈ മിന്നും പ്രകടനം ഇന്ത്യൻ പ്രീമിയർ ലീഗിലും കാണാനാവുമെന്നാണ് ആരാധകർ പ്രതീക്ഷിക്കുന്നത്. ഐപിഎഎല്ലിൽ മാർച്ച് 25നാണ് പഞ്ചാബ് കിങ്സിന്റെ ആദ്യ മത്സരം. ഗുജറാത്ത് ടൈറ്റൻസാണ് പഞ്ചാബിന്റെ എതിരാളികൾ.