തിരുവനന്തപുരം: ലഹരിവ്യാപനം തടയാൻ നടപടികൾ വിലയിരുത്തുന്നതിനായി മുഖ്യമന്ത്രി പിണറായി വിജയൻ വിളിച്ച യോഗം ഇന്ന് നടക്കും. രാവിലെ 11 മണിക്ക് മുഖ്യമന്ത്രിയുടെ ചേംബറിൽ വെച്ചാണ് യോഗം ചേരുന്നത്. വിവിധ വകുപ്പുകളുടെ സംയുക്ത യോഗത്തിൽ മന്ത്രിമാരും ഉന്നത പൊലീസ്, എക്സൈസ് ഉദ്യോഗസ്ഥരും പങ്കെടുക്കും.

ലഹരിവിരുദ്ധ പ്രവർത്തനങ്ങളുമായി ബന്ധപ്പെട്ട പദ്ധതികൾ പൊലീസും എക്സൈസും യോഗത്തിൽ അവതരിപ്പിക്കും. വിവിധ വകുപ്പുകളുമായി ചേർന്ന് സംയുക്ത പരിശോധന ഉൾപ്പെടെയുള്ള പ്രവർത്തനങ്ങൾ നടപ്പാക്കാനും തീരുമാനമുണ്ട്. ഈ മാസം 30-ന് വിദ്യാർത്ഥി-യുവജന സംഘടനകളുടെ യോഗവും മുഖ്യമന്ത്രി വിളിച്ചിട്ടുണ്ട്.

ലഹരിവ്യാപനം തടയാൻ സംസ്ഥാന വ്യാപക റെയ്ഡിനായി സമഗ്ര പദ്ധതി തയ്യാറാക്കാൻ മുൻപ് നടന്ന എക്സൈസ്-പൊലീസ് ഉന്നതതല യോഗത്തിൽ തീരുമാനിച്ചിരുന്നു. ഏകോപന ചുമതല എഡിജിപി മനോജ് എബ്രഹാമിനാണ്. ലഹരി മാഫിയ സംഘങ്ങളുടെ സമഗ്ര ഡാറ്റാബേസ് തയ്യാറാക്കും. കോളേജുകൾ, വിദ്യാഭ്യാസ സ്ഥാപനങ്ങളിലെ ഹോസ്റ്റലുകൾ, തൊഴിലാളി ക്യാമ്പുകൾ, പാഴ്സൽ സർവീസ് കേന്ദ്രങ്ങൾ എന്നിവിടങ്ങളിൽ സംയുക്ത പരിശോധന നടത്തും. അന്തർസംസ്ഥാന ബസുകളിലും അതിർത്തി ചെക്ക് പോസ്റ്റുകളിലും പരിശോധന നടത്താനും യോഗത്തിൽ തീരുമാനമായിട്ടുണ്ട്.