തിരുവനന്തപുരം: രാജീവ് ചന്ദ്രശേഖറിന്റെ തെരഞ്ഞെടുപ്പ് വന്‍മാറ്റങ്ങളിലേക്കെന്ന് സുരേഷ് ഗോപി എം.പി. രാജീവിന് ലഭിച്ച പുതിയ പദവി ഭാരിച്ച ഉത്തരവാദിത്തമന്നും നിഷ്പ്രയാസം സാധിച്ചെടുക്കാവുന്ന ഉദ്യമം മാത്രമാണ് മുന്നിലുള്ളതെന്നും സുരേഷ് ഗോപി വ്യക്തമാക്കി. മുന്‍ അധ്യക്ഷന്മാര്‍ കൂടുതല്‍ കരുത്ത് പകര്‍ന്നാണ് പാര്‍ട്ടി ഇവിടം വരെ എത്തിയതെന്ന് ചൂണ്ടിക്കാട്ടിയ സുരേഷ് ഗോപി അതുക്കും മേലെ എന്ന് പറയുന്ന കാഴ്ചയാണ് ഇനി കാണാന്‍ പോകുന്നതെന്നും കൂട്ടിച്ചേര്‍ത്തു. പല പ്രദേശങ്ങളും കേരളത്തില്‍ എടുക്കാനുണ്ടെന്നും എം.പി പറഞ്ഞു.

ബി.ജെ.പി സംസ്ഥാന അധ്യക്ഷനായി രാജീവ് ചന്ദ്രശേഖര്‍ ചുമതലയേല്‍ക്കുന്ന സംസ്ഥാന പ്രതിനിധി സമ്മേളനത്തില്‍ സംസാരിക്കുകയായിരുന്നു സുരേഷ് ഗോപി. നരേന്ദ്ര മോദിക്കും അമിത്ഷാക്കും നിര്‍മല സീതാരാമനും വേണ്ടി കേരളം മൊത്തം എടുക്കാന്‍ പോവുകയാണെന്ന് ആഞ്ഞടിച്ച് പ്രഖ്യാപിക്കണമെന്നും സുരേഷ് ഗോപി ആവര്‍ത്തിച്ചു. 

ഞായറാഴ്ച ചേര്‍ന്ന കോര്‍ കമ്മിറ്റി യോഗത്തിലാണ് രാജീവ് ചന്ദ്രശേഖറിനെ പ്രസിഡന്റായി നിര്‍ദ്ദേശിച്ചത്. ബി.ജെ.പി ദേശീയ നേതൃത്വമാണ് നിര്‍ദേശിച്ചത്. ജനറല്‍ സെക്രട്ടറി എം.ടി. രമേഷ്, ദേശീയ നിര്‍വാഹക സമിതി അംഗം ശോഭ സുരേന്ദ്രന്‍ എന്നിവരും അവസാനം വരെ പരിഗണനയിലുണ്ടായിരുന്നുവെന്നാണ് സൂചന.

രാജീവ് ചന്ദ്രശേഖര്‍ കര്‍ണാടകയില്‍ നിന്ന് മൂന്നു തവണ രാജ്യസഭാംഗമായിട്ടുണ്ട്. രണ്ടാം മോദി സര്‍ക്കാറില്‍ ഐ.ടി വകുപ്പ് ചുമതലയുള്ള സഹമന്ത്രിയായിരുന്നു. ആദ്യമായാണ് സംഘ്പരിവാര്‍ സംഘടനകളില്‍ പ്രവര്‍ത്തിച്ച് പരിചയമില്ലാത്ത ഒരാള്‍ സംസ്ഥാന ബി.ജെ.പി അധ്യക്ഷനാകുന്നതെന്ന പ്രത്യേകതയും ഈ തെരഞ്ഞെടുപ്പിനുണ്ട്.

മലയാളി കുടുംബത്തില്‍ ഗുജറാത്തില്‍ ജനിച്ച രാജീവിന്റെ വിദ്യാഭ്യാസം വിദേശത്തായിരുന്നു. ഐ.ടി ജോലിയിലും ബിസിനസിലും നേട്ടങ്ങള്‍ സ്വന്തമാക്കി 2006ല്‍ സ്വതന്ത്രനായി രാജ്യസഭാംഗമായി. അതിന് ശേഷമാണ് ബി.ജെ.പിയില്‍ ചേരുന്നത്.