അബൂദബി: വരാനിരിക്കുന്ന അധ്യയന വര്‍ഷം മുതല്‍ എല്ലാ സ്വകാര്യ സ്‌കൂളുകളും പുതിയ ട്യൂഷന്‍ ഫീസ് നയം നടപ്പിലാക്കണമെന്ന് അബൂദബി വിദ്യാഭ്യാസ, വിജ്ഞാന വകുപ്പ് (ADEK).

സ്‌കൂള്‍ ഫീസിനെ ആറ് ഘടകങ്ങളായി വിഭജിക്കുകയും ഉപകരണങ്ങള്‍, പാഠപുസ്തകങ്ങള്‍, സ്‌കൂള്‍ യൂണിഫോമുകള്‍ എന്നിവയുമായി ബന്ധപ്പെട്ട ചില ചെലവുകള്‍ ഒഴിവാക്കാനുള്ള ഓപ്ഷന്‍ മാതാപിതാക്കള്‍ക്ക് പ്രദാനം ചെയ്യുന്നതുമാണ് പുതിയ നയം. കൂടാതെ, പുതിയ നയ പ്രകാരം സ്‌കൂളുകള്‍ക്ക് 10 ഗഡുക്കളായി ട്യൂഷന്‍ ഫീസ് പിരിക്കാനുള്ള അനുവാദവുമുണ്ടാകും.

അബൂദബിയിലെ എല്ലാ സ്വകാര്യ സ്‌കൂളുകളുകള്‍ക്കും പുതിയ നയം ബാധകമാകും. സ്‌കൂള്‍ ഫീസ് നിയന്ത്രിക്കുന്നതിന് വ്യക്തവും സുതാര്യവും കൃത്യവുമായ ഒരു ചട്ടക്കൂട് സ്ഥാപിക്കാന്‍ ലക്ഷ്യമിട്ടു കൊണ്ടാണ് പുതിയ നയം നടപ്പിലാക്കാന്‍ ഒരുങ്ങുന്നത്.

ട്യൂഷന്‍ ചെലവുകള്‍ വര്‍ധിക്കുന്നത് തടയുക, വിദ്യാഭ്യാസത്തിന്റെ ഗുണനിലവാരം പ്രതിഫലിപ്പിക്കുക, വിവിധ സാമൂഹിക സാമ്പത്തിക ഗ്രൂപ്പുകളെ ഉള്‍ക്കൊള്ളുക, ഫീസ് വര്‍ധനവിന് പിന്നിലെ ഘടനയും യുക്തിയും വ്യക്തമാക്കുക എന്നിവയാണ് ഇതിന്റെ ലക്ഷ്യം.

മാതാപിതാക്കള്‍ക്ക് ഘടനാപരവും സമയബന്ധിതവുമായ ട്യൂഷന്‍ പേയ്മെന്റുകള്‍ സുഗമമാക്കുന്നതിനൊപ്പം സ്‌കൂള്‍ വിപണി വളര്‍ച്ചയ്ക്കും നിക്ഷേപകരുടെ ഇടപെടലിനും അനുകൂലമായ അന്തരീക്ഷം വളര്‍ത്തിയെടുക്കുക എന്നതാണ് ഈ നയത്തിന്റെ ലക്ഷ്യം.

ഫീസ് ഇളവുകള്‍
സ്‌കൂളിന്റെ നിലവിലെ ആവശ്യകതകള്‍ നിറവേറ്റുന്ന സെക്കന്‍ഡ് ഹാന്‍ഡ് മെറ്റീരിയലുകള്‍ (ഉദാഹരണത്തിന്, വീണ്ടും വില്‍ക്കുന്നതോ സംഭാവന ചെയ്തതോ ആയ ഇനങ്ങള്‍) ഉപയോഗിക്കാന്‍ വിദ്യാര്‍ത്ഥികള്‍ തയ്യാറാണെങ്കില്‍, ഉപകരണങ്ങള്‍, പാഠപുസ്തകങ്ങള്‍, യൂണിഫോമുകള്‍ തുടങ്ങിയ ചില ഫീസ് ഘടകങ്ങളില്‍ നിന്ന് സ്‌കൂളുകള്‍ രക്ഷിതാക്കളെ ഒഴിവാക്കണമെന്ന് വിദ്യാഭ്യാസ വകുപ്പ് പറഞ്ഞു.

ഫീസ് സുതാര്യത
സ്വകാര്യ സ്‌കൂളുകള്‍ അവരുടെ വെബ്സൈറ്റുകളില്‍ അംഗീകൃത ഫീസ് ഘടനകള്‍ വെളിപ്പെടുത്തുകയും 2025-26 അധ്യയന വര്‍ഷം മുതല്‍ ആരംഭിക്കുന്ന വകുപ്പ് സാക്ഷ്യപ്പെടുത്തിയ ഫീസ് ഷെഡ്യൂള്‍ പ്രസിദ്ധീകരിക്കുകയും വേണം.

സ്‌കൂളുകള്‍ അബൂദബി വിദ്യാഭ്യാസ വകുപ്പ് അംഗീകരിച്ച ഫീസ് നിലവാരം കര്‍ശനമായി പാലിക്കുകയും വിശദമായ ട്യൂഷന്‍ പേയ്മെന്റ് ഷെഡ്യൂളുകള്‍ ഓണ്‍ലൈനില്‍ ലഭ്യമാക്കുകയും വേണം.

മാതാപിതാക്കളുമായുള്ള കരാറുകള്‍
ട്യൂഷന്‍ പേയ്മെന്റ് ഷെഡ്യൂളുകള്‍ സംബന്ധിച്ച് രക്ഷിതാക്കളുമായി കരാറുകളില്‍ ഏര്‍പ്പെടാന്‍ സ്‌കൂളുകള്‍ക്ക് അനുവാദമുണ്ട്.

ഒരു അധ്യയന വര്‍ഷത്തില്‍ കുറഞ്ഞത് മൂന്ന് തുല്യ ഗഡുക്കളെങ്കിലും അനുവദിക്കണമെന്ന് അവര്‍ ആവശ്യപ്പെടുന്നു. പരമാവധി 10 എണ്ണം വരെയും. അധ്യയന വര്‍ഷം ആരംഭിക്കുന്നതിന് ഒരു മാസം മുമ്പുതന്നെ സ്‌കൂളുകള്‍ക്ക് ആദ്യ ഗഡു ശേഖരിക്കാവുന്നതാണ്.

റീ-രജിസ്‌ട്രേഷന്‍ ഫീസ്
അംഗീകൃത ട്യൂഷന്‍ ഫീസിന്റെ 5 ശതമാനം വരെ റീ-രജിസ്‌ട്രേഷന്‍ ഫീസ് ഈടാക്കാന്‍ അബൂദബി വിദ്യാഭ്യാസ വകുപ്പ് സ്‌കൂളുകള്‍ക്ക് അവകാശം നല്‍കിയിട്ടുണ്ട്. ഇത് നിലവില്‍ എന്റോള്‍ ചെയ്ത വിദ്യാര്‍ത്ഥികള്‍ക്ക് മാത്രമാകും ബാധകമാകുക.

പുതിയ അധ്യയന വര്‍ഷം ആരംഭിക്കുന്നതിന് നാല് മാസം മുമ്പ് വരെ സ്‌കൂളുകള്‍ക്ക് ഈ ഫീസ് ശേഖരിക്കാം. ട്യൂഷന്‍ പേയ്മെന്റുകള്‍ക്ക് പകരമായി മാതാപിതാക്കളില്‍ നിന്ന് ഏതെങ്കിലും അധിക സാമ്പത്തിക ഗ്യാരണ്ടികള്‍ അഭ്യര്‍ത്ഥിക്കുന്നതിനോ സ്വീകരിക്കുന്നതിനോ സ്‌കൂളുകള്‍ക്ക് വിലക്കുണ്ട്.

Abu Dhabi Makes Textbook and School Uniform Fees Optional Starting Next Academic Year