കൊച്ചി: ടാർഗെറ്റ് കൈവരിക്കാത്തതിന്റെ പേരിൽ സ്വകാര്യ സ്ഥാപനത്തിലെ ജീവനക്കാർക്ക് നേരെ ക്രൂരമായ തൊഴിൽ പീഡനം നടക്കുന്നതായി തെളിയിക്കുന്ന ദൃശ്യങ്ങൾ പുറത്തുവന്നതോടെ, കൊച്ചിയിലെ കെൽട്രോ സ്ഥാപന ഉടമയും ജനറൽ മാനേജറുമായ ഹുബൈലിനെതിരേ ഗുരുതര ആരോപണങ്ങൾ ഉയർന്നു. കേസിൽ പരാതി ലഭിച്ചതായി പൊലിസ് സ്ഥിരീകരിച്ചു. വിവിധ പേരുകളിൽ സ്ഥാപനങ്ങൾ നടത്തിവരുന്ന ഹുബൈൽ, ജീവനക്കാരെ കഴുത്തിൽ ബെൽറ്റ് വെച്ച് നായകളെപ്പോലെ മുട്ടുകാലിൽ നടത്തിക്കുകയും, നിലത്തു നാണയങ്ങളും ചീഞ്ഞ പഴങ്ങളും നക്കിയെടുക്കാൻ നിർബന്ധിക്കുകയുമായിരുന്നു എന്നാണ് പരാതികളിൽ വ്യക്തമാക്കുന്നത്. ജീവനക്കാരെ കമ്പനിയുടെ തന്നെ താമസ സ്ഥലങ്ങളിൽ പാർപ്പിച്ചിരുന്നുവെന്നും, ടാർഗറ്റ് കൈവരിക്കാത്തവരെ സ്ഥിരമായി ക്രൂരമായി പീഡിപ്പിക്കാറുണ്ടെന്നും ജീവനക്കാർ പറയുന്നു.

സംഭവവുമായി ബന്ധപ്പെട്ട ദൃശ്യങ്ങൾ പുറത്ത് വന്നതിനെ തുടർന്ന് പൊലീസ് കലൂരിലെ ഹിന്ദുസ്ഥാൻ പവർ ലിങ്ക്‌സ് എന്ന സ്ഥാപനത്തിൽ പരിശോധന നടത്തി. എന്നാൽ സംഭവം അവിടെയല്ലെന്ന് പൊലീസ് വ്യക്തമാക്കി. സംഭവത്തിൽ തൊഴിൽ വകുപ്പ് ഇടപെടൽ പ്രഖ്യാപിച്ചിട്ടുണ്ട്. കമ്പനി നടത്തുന്ന വിവിധ ശാഖകളിൽ പരിശോധന നടത്തുമെന്നും, ഫോർട്ടുകൊച്ചി, പെരുമ്പാവൂർ എന്നിവിടങ്ങളിലെ ബ്രാഞ്ചുകളിലും പരിശോധന നടത്തുമെന്ന് തൊഴിൽ വകുപ്പ് അറിയിച്ചു.