റിയാദ്: പത്ത് ദിവസമായി മക്കയില്‍ വെച്ച് കാണാതായ കോഴിക്കോട് കുണ്ടുങ്ങല്‍ സ്വദ്ദേശി അബ്ദുല്‍ അസീസിനെ ഹറമിന് അടുത്ത് നിന്ന് കണ്ടെത്തി. 

കോഴിക്കോട് കുണ്ടുങ്ങല്‍ സ്വദേശി അബ്ദുല്‍ അസീസി (68) നെ മാര്‍ച്ച് 28 മുതല്‍ കാണാതായിരുന്നു. മക്കയില്‍ നിന്നും അവസാനമായി മാര്‍ച്ച് 28നാണ് അസീസ് ഫോണില്‍ വിളിച്ചതെന്നും മസ്ജിദുല്‍ ഹറമിലെ മതാഫില്‍ (ത്വവാഫ് ചെയ്യുന്നസ്ഥലം) ആണ് ഉള്ളതെന്നും അദ്ദേഹം പറഞ്ഞുവെന്നും പിന്നീട് ബന്ധപ്പെടാന്‍ കഴിഞ്ഞില്ലെന്നുമാണ് ബന്ധുക്കള്‍ അറിയിച്ചത്. പ്രമേഹം, രക്തസമ്മര്‍ദ്ദം ഉള്‍പ്പെടെയുള്ള ആരോഗ്യപ്രശ്‌നങ്ങള്‍ നേരിടുന്ന വ്യക്തിയാണ് അസീസ്.

മക്കയിലും പരിസരങ്ങളിലും ആശുപത്രികളിലുമൊക്കെ കഴിഞ്ഞ ദിവസങ്ങളില്‍ അന്വേഷണം നടത്തിയെങ്കിലും കണ്ടെത്താനായിരുന്നില്ല. മക്കയില്‍ ഇബ്രാഹിം ഖലീല്‍ റോഡില്‍ ആണ് അസീസിന്റെ താമസം.

മക്കയിലെ കെഎംസിസി നേതാവും സാമൂഹിക പ്രവര്‍ത്തകനുമായ മൂജീബ് പൂക്കോട്ടൂരിന്റെ നേതൃത്വത്തില്‍ ആണ് സന്നദ്ധ പ്രവര്‍ത്തകര്‍ തിരച്ചില്‍ നടത്തിയത്. മുജീബ് പൂക്കോട്ടൂര്‍ തന്നെയാണ് ഫേസ്ബുക്ക് പോസ്റ്റ് വഴി അസീസിനെ കണ്ടെത്തിയ വിവരം അറിയിച്ചത്.